Nazirlik bu avtomobillərin istismarını QADAĞAN EDİR

Havanın çirklənməsində ən böyük pay avtomobillərin üzərinə düşür. Bu problemin ortaya çıxmasına isə daha çox köhnə maşınlar səbəb olur. Təəssüflə qeyd edə bilərik ki, hələ də ölkəmizdə ötən əsrin 90-cı illərinin istehsalı olan avtomobillər üstünlük verilir. Onların əksəriyyətinin dizel yanacağı ilə işləməsi və texniki sazlıqlarının get-gedə pisləşməsi havanın çirklənməsində bu avtomobillərin iştirakını daha da artırır. Bəs havanı daha çox çirkləndirən maşınlara hansı dövlət qurumu nəzarət edir? Daha çox zəhərli qaz buraxan avtomobilləri hansı dövlət qurumu saxlayaraq cərimələyə bilər?

Ekologiya və Təbii Sərvətlər Nazirliyi Lent.az-ın sorğusuna cavab olaraq bildirib ki, nazirlik bu istiqamətdə Dövlət Yol Polisi ilə birgə tədbirlər həyata keçirir:

“Azərbaycan Prezidentinin müvafiq sərəncamı ilə təsdiq edilmiş “Azərbaycanda demoqrafiya və əhali sakinliyinin inkişafı sahəsində Dövlət Proqramı”nın icrası ilə əlaqədar avtomobil nəqliyyat vasitələri ilə atmosfer havasının çirklənməsinə nəzarətin gücləndirilməsi məqsədi ilə təsdiq olunmuş birgə tədbirlər planına uyğun olaraq Ekologiya və Təbii Sərvətlər Nazirliyinin Regional Ekologiya və Təbii Sərvətlər idarələri Daxili İşlər Nazirliyinin Baş Dövlət Yol Polisi İdarəsinin yerli qurumları ilə birlikdə hər il Respublika ərazisində “Təmiz hava” aylığı tədbirləri həyata keçirir.

“Atmosfer havasının mühafizəsi haqqında” qanunun tələblərinə əməl olunmasına nəzarət etmək məqsədi ilə avtomobil nəqliyyat müəssisəsində və nəqliyyat sexlərində araşdırmalar aparılır. Bu təsərrüfatlarda avtomobillərin işlənmiş qazlarında zərərli maddələrin miqdarının normativ həddən artıq olduğu aşkar olunduqda, profilaktik tədbirlər aparılaraq tüstülük faizinin miqdarının norma həddinə endirilməsi tələbi qoyulur. Bu mümkün olmadıqda nəqliyyat vasitəsinin istismarı qadağan edilir və nəqliyyat müəssisələrinə qarşı inzibati tədbirlər görülür”.

Nazirlikdən verilən məlumata görə, magistral yollarda avtomobillər fərdi qaydada yoxlanılır. Avtomobilin atmosferi normadan artıq çirkləndirməsi aşkar edildikdə Dövlət Yol Polisi inzibati qaydada protokollar tərtib edir:

“Magistral yollarda keçirilən reydlər zamanı avtomobil nəqliyyat vasitələri fərdi qaydada yoxlanılır. Atmosfer havasını müəyyən olunmuş normadan artıq çirkləndirən avtomobillərin sürücülərinə qarşı Dövlət Yol Polisi inzibati qaydada protokollar tərtib edir. Bununla yanaşı, nəqliyyat vasitələrinin işlənmiş qazlarında zərərli maddələrin miqdarı hər il keçirilən avtomobillərin texniki baxışı tədbirləri zamanı yoxlanılır”.

Nazirlikdən onu da bildiriblər ki, avtomobilin işlənmiş qazlarında normadan artıq zərərli maddələr olan avtomobil nəqliyyatı vasitələrini ancaq DYP saxlaya bilər.