Lent.az qeybə çəkilmiş döyüşçünün anasını tapdı: “O mənim oğlumdu!”

20 il əvvəl Qarabağ müharibəsində yaralanaraq vətənindən və ailəsindən xəbərsiz Azərbaycanda qalan Yevgeni Momotun valideynləri tapılıb. Bu barədə Lent.az-a Uzaq Şərqə, Jenyanın anadan olduğu Obluçye şəhərinə ezam olunmuş əməkdaşımız xəbər verib. Əməkdaşımızın dediyinə görə, Obluçyedə Momotlar ailəsini tapmaqda Azərbaycan diasporunun fəallarından olan Nazim Məmmədovun da köməyi olub:

“Biz yerli hüquq mühafizə orqanlarına müraciət etdik. Onlar Jenyanın ailəsinin Obluçyedə yaşadığını təsdiqlədilər və konkret ünvanı göstərdilər: “SSRİ-nin 60 illiyi” küçəsi, ev 68. Daha sonra bu evdə qeydiyyatda olan telefon nömrəsinə zəng etdik. Dəstəyi Yevgeninin anası Zinaida Yeqorovna götürdü. Bizim aramızda belə bir dialoq oldu:

- Salam, Zinaida Yeqorovnadır?

- Bəli.

- Sizdən bir şey soruşmaq istəyirəm. Amma xahiş edirəm, düzgün başa düşün. Jenya adı sizə nəsə deyir?

- Jenya? Siz “Jenya” dediniz? Aman Tanrım! Necə ki?! O mənim oğlumdu!

- Hardadı o?

- Nə bilim, ay oğul. Yüz ildir ki, yoxdu. Elə o gedəndi. Axı nə olub?

- Biz sizinlə görüşə bilərikmi?

- Əlbəttə. Gəlin evə. Mütləq gəlin. Axı siz kimsiz? Jenyanı hardan tanıyırsız? Nəsə eşitmisiz? (Həyəcanla)

- Zinaida Yeqorovna, rica edirəm, sakit olun. Hər şey yaxşıdı...

- ...”

Sonra nə olacaq? Sonrasını biz də təsəvvür edə bilmirik.

Lent.az-ı izləyin...