"Gələcəyə Baxış” bir sıra rayon və şəhərlərində sorğu keçirib

“Gələcəyə Baxış” Avropaya İnteqrasiya İctimai Birliyi Azərbaycanın bir sıra rayon və şəhərlərində sorğu keçirib. Prezident yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə reallaşan layihə çərçivəsində Azərbaycan əyalətlərində milli adət-ənənələrlə bağlı aparılan monitorinqlərdə yaşlı nəsil “SOS” siqnalı verib.

Lent.az-ın məlumatına görə, müasir qloballaşma şəraitində Azərbaycan cəmiyyətində milli adət və ənənələrin kənar faktorların təsiri altında transformasiyaya uğradığı üzə çıxıb. “Gələcəyə Baxış” Avropaya İnteqrasiya İctimai Birliyinin Azərbaycanın bir sıra rayon və şəhərlərində apardıqları sorğularda yaşlı nəsil milli adət-ənənələrin unudulmaqda olduğunu əsas gətirir, amma gənc nəslin nümayəndələri bunun əksini söyləyir. Əldə edilən nəticəyə əsasən, milli adət-ənənələrlə bağlı yaşlı və gənc nəsil arasında güclü fikir ayrılığı yaranmaqdadır. Azərbaycanın Xaçmaz, Quba Lənkəran və Masallı rayonlarında yaşayan yaşlılar toy adət-ənənələrinin köklü şəkildə dəyişdiyini söyləyirlər. Yaşlılar deyir ki, indi gənclər toylarda ağsaqqal-ağbirçək xeyir-duası, məsləhət eşitmək istəmir. Bütün toy ancaq gənclərin ortaya düşüb oynaması ilə sona çatır.