9-cu mikrorayonda zeytun ağaclarının soyqırımı - SOS
30 sentyabr 2015 17:36 (UTC +04:00)

9-cu mikrorayonda zeytun ağaclarının soyqırımı - SOS

"Səhər-səhər orada gördüm ki, zeytun budaqlarını qırıb ora yığıblar. Maşın gəldi, 5-6 adam yığıb apardı, nə qədər zeytun da qaldı orada. Qırıb tökürlər, heç kim baxmır. Biri deyir qaçqınam, biri deyir buranın işçisiyəm, biri deyir çörək pulum yoxdur, yığıb satıram".
 
Bura Binəqədi rayonu ərazisində yerləşən Zərifə Əliyeva adına parkın arxa hissəsindəki zeytun bağıdır. Bu ərazi 55 hektardır. Ərazidə yaşayan sakinlərin əsas şikayəti isə insanların zeytunu yığıb aparması deyil, ağacların budaqlarının qırılmasıdır. 
 
- Çıxırlar ağacın başına, budağı qırıb atırlar yerə, təzədən düşüb yerdə yığırlar, meyvəni götürürlər, ağacların budaqları da qalır yerdə. Burada heç bir nəzarət yoxdur.
 
- Yığmaqdırsa, bunu adam kimi yığarlar da. Zeytunu yığırlar, ağacı qırırlar. Yuxarıdan mən görmüşəm, ət döyənlə qırıb tökürlər iri budaqları, yerə atırlar.
 
- Keçmişdə oktyabrın 15-dən başlayıb yığardılar. Çünki onda yağlanma prosesi başlayırdı. İndi sentyabr ayı gələn kimi kim yığır, məlum deyil. Buranın 55 hektar sahəsi var. 55 hektarın zeytununu kim yığır, hara gedir? Bu meyvədir də, nəzarət etmək lazımdır.
 
Biz hal-hazırda sakinlərin şikayət etdiyi zeytun bağındayıq. Gördüyünüz kimi, ağacları bu şəkildə kəsib və üzərindən zeytun toplayıblar.
 
Məsələ ilə bağlı Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova ilə əlaqə saxladıq. Qurum rəsmisi bildirdi ki, bu barədə onlara sentyabr 28-də məlumat daxil olub: "Dərhal bizim müfəttişlər tərəfindən araşdırmalar aparılıb, reydlər keçirilib. Fakt öz təsdiqini tapıb. Təqsirkarların şəxsiyyətinin müəyyən edilməsi və barələrində qanuna müvafiq tədbirlərin görülməsi məqsədilə Binəqədi Rayon Polis Şöbəsinə müraciət edilib".
 
İradə İbrahimova əlavə edib ki, bu gün də günün müxtəlif vaxtlarında ərazidə reydlər keçirilib və müşahidələr aparılıb. Ağacların qırılması hallarına rast gəlinməyib. Bununla belə, Bakı şəhər Yaşıllaşdırma Təsərrüfatı Birliyinə məcburi göstəriş verilib ki, ərazi təmizlənib əvvəlki vəziyyətinə gətirilsin. Hazırda zeytun bağında təmizlənmə işləri aparılır.
# 218
avatar

Oxşar yazılar