İnsanların 50 faizi xəbər oxumaq istəmir - MARAQLI STATİSTİKA

Pis xəbərlər sanki heç vaxt bitmir: Ukraynada müharibə, Yaxın Şərqdə təhdidlər, inflyasiyanın artması, ticarət müharibələri. Bütün bunlar sonu görünməyən sosial media skrollinqi ilə birləşəndə, insanların psixi sağlamlığına ciddi təsir göstərməyə başlayır.

Lent.az xarici mediaya istinadən xəbər verir ki, getdikcə daha çox insan xəbərləri izləməyi şüurlu şəkildə azaltmağa və ya onlardan tamamilə uzaq durmağa çalışır. Reuters Institute-un rəqəmsal xəbərlər üzrə son hesabatına əsasən, 48 ölkədən sorğuda iştirak edənlərin orta hesabla 40%-i bəzən və ya tez-tez xəbərlərdən uzaq durduqlarını bildiriblər. Bu, 2017-ci ildəki 29%-lə müqayisədə əhəmiyyətli artımdır.

Böyük Britaniya və ABŞ-də respondentlərin 40%-dən çoxu artıq xəbərlərin istehlakını bilərəkdən azaldıb.

Hesabatda bu tendensiyanın media qurumlarına olan aşağı etimad və mənfi xəbərlərin davamlı axınından yaranan yorğunluq hissi ilə sıx bağlı olduğu qeyd olunur. Müəlliflər iki əsas xəbərdən uzaq durma tipini ayırd edirlər:

Daimi uzaq duranlar – adətən, təhsili aşağı olan və ümumiyyətlə xəbərlərə maraq göstərməyən şəxslər;

Seçici uzaq duranlar – qəsdən xəbər istehlakını azaldan, özünü həddindən artıq narahat və dağıdıcı məlumatlardan qorumağa çalışan şəxslər.

Bu dinamika təkcə xəbər platformalarının effektivliyini deyil, həm də demokratiyanın davamlılığını sual altına alır. Axı balanslı informasiyaya çıxış demokratiyanın əsas dayaqlarından biridir.