Günəşdə son illərin ən güclü PARTLAYIŞI: Yer zərbə altındadır

Son 24 saat ərzində günəş ləkələrinin sayında əhəmiyyətli artım və Günəşdə maqnit sahəsinin mürəkkəbliyində artım müşahidə olunub.

Lent.az-ın xarici mediaya istinadən məlumatına görə, son 6 ildə ən güclü partlayış Günəşin aktiv bölgəsində baş verib. Eyni zamanda radiasiyası planetimizə yönələn alovlar da qeydə alınıb.

Dekabrın 14-də Günəşin aktiv bölgəsində X2.8 sinifli günəş məşəlinin püskürdüyü bildirilir. Hadisə UTC vaxtı ilə 16:47-də (Bakı vaxtı ilə 19:47 – red.) başlayıb və 17:12 UTC (Bakı vaxtı ilə 20:12-də – red.) başa çatıb. Bu, həm də cari günəş dövrünün ən güclü günəş partlamasıdır.

Alimlər 2118 km/s təxmin edilən sürətlə II Tip radio emissiyasını aşkar etdilər ki, bu da partlayış zamanı tac kütləsinin atılmasının baş verdiyini göstərir.

Bundan əlavə, böyük günəş püskürmələri ilə əlaqədar baş verən və adətən güclü tac kütlələrinin atılması və günəş radiasiya fırtınaları ilə əlaqəli olan IV tip radio emissiyaları aşkar edilib.

Radiotezliklərin Cənubi Amerikada ən çox pisləşəcəyi proqnozlaşdırılır.

Güclü alov ərəfəsində Günəşin eyni bölgəsində daha az güclü bir neçə püskürmə baş verib. Məlumata görə, son 24 saat ərzində günəş ləkələrinin əhəmiyyətli dərəcədə artması və Günəşdə maqnit sahəsinin mürəkkəbliyinin artması qeydə alınıb.

Proqnozlara görə, dekabrın 16-dək Yer kürəsində geomaqnit qasırğaları gözlənilir.