Qaxda ibtidai insanların yaşadığı mağara və zağalar aşkarlandı

Azərbaycan Milli Elmlər Akademiyası (AMEA) Arxeologiya və Etnoqrafiya İnstitutunun aparıcı elmi işçisi, Paleolit arxeoloji ekspedisiyası Ceyrançöl dəstəsinin rəhbəri Mənsur Mənsurovun başçılığı ilə Qax rayonu ərazisində tədqiqat işləri davam etdirilir.

Lent.az-ın AMEA-nın rəsmi saytına istinadən verdiyi məlumata görə, Ləkit-Kötüklü kəndindən şimalda, yerli əhalinin “xorqaya” və “skolatlar” adlandırılan ərazidə aparılan kəşfiyyat işləri zamanı arxeoloqlar dəniz səviyyəsindən 2500 metr yüksəklikdə dolomit qaya zolaqlarından ibarət qaya yarıqlarının arasında ibtidai insanların yaşaya biləcəyi ehtimal olunan mağara və zağalar aşkarlanıb.

Arxeoloqların ehtimalına görə, bu qayaaltı qövsvari boşluqlarda ibtidai insanların yaşaması üçün münbit şərait olub. Arxeoloji axtarış-kəşfiyyat işləri rayonun əsasən İlisu, Sarıbaş, Ağçay, Ləkit və Ləkit-Kötüklü kəndlərində aparılıb. Ərazidə ibtidai insanların məskunlaşması və tarixi ilə bağlı daha dəqiq məlumatlar gələcəkdə ərazidə aparılacaq arxeoloji tədqiqatlar zamanı məlum olacaq.