Siqaret çəkmək bu xəstəliklərə səbəb olur - MÜSAHİBƏ

Lent.az Səhiyyə Nazirliyi Elmi-Tədqiqat Ağciyər Xəstəlikləri İnstitutunun direktoru İradə Axundovanın müsahibəsini təqdim edir:

- İradə xanım, bilmək istərdik ki, siqaret asılılığı hansı xəstəliklərin yaranma riskini artırır?

- Tütün məhsullarından istifadənin başda ağciyər olmaqla bütün orqanlara ciddi zərərləri var. Ümümdünya Səhiyyə Təşkilatının məlumatına görə, hər 6 saniyədən bir dünyada siqaretçəkmə ilə bağlı xəstəliklər səbəbindən bir nəfər dünyasını dəyişir.

Tütün məhsullarından istifadə bir sıra xəstəliklərin yaranma riskini artırır. Onkoloji xəstəliklər - tənəffüs, mədə-bağırsaq, sidik-cinsiyyət, qantörədici sistemlərdə yüksək ehtimal ilə baş verə bilər. Siqaret çəkmək ağciyərlərdə xərçəng xəstəliyinin yaranmasının əsas səbəbi hesab edilir. Ağciyər xərçəngindən ölən kişilərin 90 faizində siqaret çəkmək əsas amil sayılır. Aktiv siqaret çəkənlərdə ağız boşluğunun, dodağın, mədənin və onikibarmaq bağırsağın xərçəng xəstəliyinin yaranması riski artır. Ürək-damar xəstəlikləri: ateroskleroz, serebrovaskulyar xəstəliklər, həmçinin qarın aortasının anevrizmasının inkişafı ehtimalı var. Bundan əlavə, tənəffüs yolları xəstəliklərinin (ağciyərlərin xroniki obstruktiv xəstəliyi, bronxit, pnevmoniya) yaranması mümkündür. Eyni zamanda, siqaret çəkən kişilərdə erektil disfunksiya inkişaf riski nisbətən çoxdur.

Bu insanlarda digər xəstəliklər (katarakta, mədənin peptik xorası, immun sisteminin zəifləməsi) müşahidə olunur, onların xarici görünüşü dəyişir. Siqaret çəkmək dişlərin və dırnaqların saralmasına, saçların tökülməsinə və qırışların yaranmasına gətirib çıxarır. Bəzən insanlar səhv olaraq bədən çəkisinə tütün çəkməklə nəzarət etməyi düşünürlər.

- Hamilə qadının siqaret asılılığı doğulacaq körpədə hansı fəsadlara səbəb ola bilər?

- Siqaret çəkən qadınlarda fertillik (münbitlik) zəifləyir. Siqaret tüstüsü ilə daxil olan zərərli maddələr həm hamilə qadına, həm də bətnindəki dölə mənfi təsir göstərir. Siqaret tüstüsünün toksiki maddələri hamiləlik zamanı baş verən müxtəlif fəsadların yaranması ehtimalını və dölün oksigen çatışmazlığına gətirib çıxararaq onun bütün orqanlarında normal inkişafın pozulması riskini artırır. Siqaret çəkən qadınlarda ağırlaşmalar, vaxtından əvvəl doğuş, normadan aşağı çəkili yenidoğulmuşlar, ciftin vaxtından əvvəl ayrılması, uşaqlarda qəflətən ölüm sindromu və anadangəlmə anomaliyalar riski yüksəkdir. Bundan başqa, daha sonra uşaqlarda öyrənmə zəifliyi, hiperaktivlik, davranış pozuntuları, gələcəkdə bronxial astma riski yüksək olur.

- Passiv siqaret çəkənlər hansı xəstəliklərdən əziyyət çəkirlər?

- Tibdə xroniki siqaret çəkmək siqaret asılılığı, nikotin asılılığı, tütünə və ya nikotinə qarşı meyl kimi müəyyən edilir. Bu, heç də zərərsiz bir vərdiş deyil ki, insan onu asanlıqla tərgitsin. Siqaret çəkməkdən imtina üçün təkrari müdaxilələrin və cəhdlərin göstərilməsi tələb olunur.

Aktiv siqaret çəkmək - qurudulmuş və ya emal edilmiş közərən tütün yarpaqlarının tüstüsünün (əksər hallarda siqaretçəkmə vasitəsi ilə) nəfəs yolları ilə qəbul edilməsidir.

Passiv siqaret çəkmək - ətrafa yayılan tütün tüstüsünün nəfəs yolları ilə qəbul edilməsidir. Passiv siqaret çəkmək, adətən qapalı yerlərdə baş verir, lakin açıq havada da baş verə bilər.

Üçüncülü siqaret çəkmək - siqaret çəkməyi qutarandan sonra otaqda uzun müddət qalan nikotin qalıqları və digər kimyəvi maddələr ilə nəfəs alınmasıdır. Otaqda nikotin qalıqları və digər kimyəvi maddələr məkandakı əşyaların müxtəlif səthlərində qala bilər.

Elmi cəhətdən sübut edilib ki, siqaret tüstüsünün tərkibində 7000-dək kimyəvi maddə mövcuddur. Passiv siqaret çəkənlərin məruz qaldığı duman çevrəsi tütün dumanı adlanır və 2 hissəyə ayrılır - yanan siqaretdən ayrılan və siqaret çəkənin nəfəsi ilə yayılan.

Bu tip zərərli dumana məruz qalan insanlarda siqaret çəkənlər qədər sağlamlıq problemlər yaşanılır. Əsasən uşaqlarda orta qulaq iltihabı, bronxit, astma, piylənmə, 2-ci tip şəkərli diabet və s. müşahidə olunur.

- Siqareti tərgitdikdən neçə müddət sonra orqanizmdə müsbət yönümlü dəyişikliklər hiss olunur?

- Siqaret çəkmək nəticəsində əmələ gələn bir çox xəstəliklərin yaranma riski tütünçəkmədən imtina etdikdən sonra azalır. Xəstəliklərin yaranmasına görə fərdi risk tütünçəkmənin müddətindən və intensivliyindən asılıdır.
Siqareti tərgitdikdən sonra orqanizmdə təmizləmə aşağıdakı mərhələlərlə başlayır:

• İlk 20 dəq ərzində qan təzyiqi normallaşır;

• 8 saat sonra qanda oksigen səviyyəsi normallaşır, miokard infarktı riski azalır;

• 24 saat sonra karbonmonoksit orqanizmdən tamamən təmizlənir;

• 48 saat sonra qanda nikotin səviyyəsi azalır, dad və qoxu hissi yüksəlir;

• 2 həftə-3ay arası qan dövranı tam bərpa olur. Ağciyərlərin həyat tutumu 30 faiz artır. Fiziki aktivlik yaxşılaşır;

• 1 ildən sonra koronar arteriyalarla bağlı xəstəlik riski 50 faiz azalır;

• 5 il sonra ağciyər xərcəngi riski 2 dəfə azalır. İnsult riski siqaret çəkməyənlərlə eyni olur.