Yay istisində orqanizm daha çox maye itirdiyi üçün düzgün su qəbulu xüsusi əhəmiyyət daşıyır. Həkimlər bildirirlər ki, çox soyuq, buzlu su içmək hər zaman düşündüyümüz qədər faydalı olmaya bilər.
Lent.az xarici mediaya istinadən xəbər verir ki, havanın temperaturu 30 dərəcədən yuxarı olduqda buz kimi soyuq su içmək orqanizmin təbii soyuma mexanizmlərinin işinə mane ola bilər. Çox soyuq su qan damarlarının qısa müddətlik daralmasına səbəb olur. Nəticədə orqanizmin istiliyi xaric etməsi və özünü təbii yolla soyutması çətinləşə bilər.
Hansı temperaturda su içmək daha faydalıdır?
Həkimlər otaq temperaturunda və ya bir qədər sərin su içməyi tövsiyə edirlər. Belə su orqanizm tərəfindən daha rahat mənimsənilir, itirilən mayenin bərpasına kömək edir və bədənin istilik tənzimləmə sisteminin normal işləməsini dəstəkləyir. Güclü tərləmədən sonra su balansının bərpası üçün də bu seçim daha məqsədəuyğun hesab olunur.
Hansı içkilərdən uzaq durmaq lazımdır?
Mütəxəssislər şəkərli qazlı içkilərin və əlavə şəkər tərkibli paket şirələrinin istifadəsini məhdudlaşdırmağı tövsiyə edirlər. Bu içkilər yüksək şəkər tərkibinə görə susuzluğu lazımi səviyyədə aradan qaldırmır. Əksinə, maye itkisini artıra, qanda şəkərin sürətlə yüksəlməsinə səbəb ola və nəticədə yorğunluq hissini gücləndirə bilər. Bundan əlavə, həddindən artıq tərləmə də müşahidə oluna bilər.
Həkimlər isti havalarda güclü susuzluq hissini gözləmədən gün ərzində az-az, müntəzəm şəkildə adi su içməyi məsləhət görürlər. Bu, orqanizmdə maye balansını qorumağın, normal istilik tənzimlənməsini təmin etməyin və yay istisini daha rahat keçirməyin ən etibarlı yollarından biri hesab olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
