Türklüyün qalasında qürur günləri

...Bu konsertdən üç gün əvvəl Naxçıvan daha geniş, bu dəfə beynəlxalq tədbirə ev sahibliyi eləmişdi. Həmin konsertdən üç gün sonrasa - artıq mən Bakıda olanda paytaxtda keçirilən bir tədbirin sorağını aldım...

***

...Səfərimiz üç gün çəkdi. Səfərdən bir neçə gün əvvəlsə Şəmistan Əlizamanlının konsertdə oxuyacağı mahnılarından ibarət diski Naxçıvana göndərilmişdi. Naxçıvan Filarmoniyasının Simfonik Orkestrinin və xorunun bu mahnıları məşq eləməsi üçün. Musiqiçi olmasam da, vallah, belə məsələlərə az-çox bələdəm. Bilirəm ki, 15-16 mahnının iki gün ərzində həm sifmonik orkestrlə, həm xorla məşqi hər orkestrin işi deyil. Ancaq "Gənclik Mərkəzi"nin salonunda məlum oldu ki, qısa müddətə nəinki hər şey hazırdı, hətta Əlizamanlının hamımıza tanış olan məşhur mahnıları ilk dəfə olaraq nota köçürülüb, orkestrin bütün üzvlərinə təqdim edilib. Orada olduğumuz üç gün ərzində mən bu tədbirin təşkilatçılarının, musiqiçisindən, tələbəsindən tutmuş hər bir insanın vətənpərvərliyindən, torpağa, millətə, dövlətə bağlılığından qürur duydum. Bu konsertdə Azərbaycanın Milli qəhrəmanları xatırlandı, onların adları, əməlləri anıldı, bütün zal ayağa qalxıb, bəlkə də bütün türk dünyasında məşhur olan mahnıları solistlə birgə ifa elədi. Və elə konsert təzəcə başa çatmışdı ki, hərbi hissələrin birindən "əsgərlər Əlizamanlını gözləyir" mesajı ilə həmin gün daha bir görüşün iştirakçısı olduq.

Bütün bunları heç kim heç kimə məcbur eləmirdi. Çünki elə şeylər var ki, Naxçıvanda həqiqətən, məcburidir. Burada qanunlara riayət, keçmişinə, xalqın adət-ənənəsinə hörmət eləməlisən; burada şəxsi mənafeyini dövlətin, millətin mənafeyindən üstün tuta bilməzsən; burada Naxçıvanın böyük Türk dünyasının qalası, Azərbaycanın vuran ürəyi olduğunu həmişə yadda saxlamalısan. Hər dəfə bu yurd yerinə gedəndə həmişə bir mühüm həqiqətə yenə inanıram: Naxçıvana xoş niyyətlə, qərəzsiz, xalqın, dövlətin haqqını öz haqqından yüksək tutaraq getməlisən. Vallah, burada heç kimi qanundan kənar heç nəyə vadar eləmirlər. Sizcə, bunlara əməl eləmək belə çətin məsələdi?

...Dediyim kimi, Şəmistan Əlizamanlının konsertindən üç gün əvvəl Naxçıvanda onlarla ölkə idmançılarının qatıldığı beynəlxalq idman yarışı keçirilmişdi. Üç gün keçmişdi ki, həmin konsert oldu. Üç gün sonrasa Bakıda oturub "Naxçıvan ziyalılığı" eləyənlərin yığıncağının sorağını aldım. Mən gördüklərimlə sorağını aldıqlarım arasında yerlə-göy qədər fərqlərin olduğunu bilirəm. Və bunun hamının bilməsi üçün sadəcə, pis niyyət olmadan Naxçıvana getmək, Naxçıvanı tanımaq lazımdı, vəssalam...