Qardabanidə el bayramı keçirildi

Azərbaycanlıların kompakt yaşadığı Qardabanidə ənənəvi el bayramı keçirilib. APA-nın Gürcüstan bürosunun məlumatına görə, "Qardabnoba" ("Qardabani Günü") adlandırılan el bayramı çərçivəsində rayon mərkəzində David Aqmaşenebeli adına istirahət parkının bərpadan sonra açılışı keçirilib. Açılışı Kvemo Kartli bölgə qubernatoru Paata Xizanaşvili və Qardabani rayon icra hakimiyyətinin başçısı Qela Nioradze həyata keçirib. Sonra el bayramı münasibətilə Kvemo Kartli qubernatoru P. Xizanaşvili gürcü və azərbaycanlıları təbrik edib, rayon əhalisinə əmin-amanlıq, sülh və xoşbəxtli və bərəkət arzulayıb. Qubernator P. Xizanaşvili təbrikində bölgədə və Qardabani rayonunda son illər bir sıra tikinti layihələrinin həyata keçirildiyini, həmçinin kənd təsərrüfatının inkişaf etdirildiyini bildirib.

Tədbirdə milli rəqslər ifa edilib, milli yeməklər nümayiş olunub. Tədbirdə məktəblilər geniş konsert proqramı ilə çıxış ediblər. "Qardabnoba" bayramında kənd təsərrüfatı məhsullarının və məktəblilərin rəsm və əl işlərinin sərgisi də keçirilib. Bayram tədbiri axşamadək davam edib.

Tədbirdə qubernatorun azərbaycanlı və gürcü müavinləri, Qardabani rayon icra başçısının müavini Ülfət Ağamalıyev və digər rəsmi şəxslər, həmçinin Qardabani rayonunda fəaliyyət göstərən gürcü və Azərbaycandilli orta məktəblərin direktor və müəllimləri, şagirdlər, ətraf kəndlərdən gələn sakinlər, QHT nümayəndələri, jurnalistlər iştirak ediblər.