“Gəncə xanlarının nəsil şəçərəsi”nin təqdimatı keçirilib

“Cavadxan” Tarix və Mədəniyyət Fondu tərəfindən “Gəncə xanlarının nəsil şəcərəsi”nin təqdimat mərasimi keçirilib.

Lent.az-ın verdiyi xəbərə görə, elm və mədəniyyət xadimlərinin, millət vəkillərinin iştirak etdiyi tədbiri açan Fondun I vitse-prezidenti, professor Ramiz Hümbətov Azərbaycan xalqının həmişə Cavadxanın şəxsiyyətinə hörmət və ehtiram bəslədiyini qeyd edib, onun nəvələri İsmayıl xan və Adil xan Ziyadxanovların Azərbaycan Demokratik Respublikasının dövlət orqanlarında xidmətindən bəhs edib.

Professor bu qurumun 6 il əvvəl Heydər Əliyev Fondunun Prezidenti, UNESCO-nun və İSESCO-nun xoşməramlı səfiri, millət vəkili Mehriban Əliyevanın dəstəyi ilə təsis edildiyini və ötən illərdə bir sıra uğurlara imza atdığını vurğulayıb,

Daha sonra fondun təsisçisi və “Gəncə xanlarının nəsil şəcərəsi”nin müəlliflərindən biri, İsmayıl xan Ziyadxanovun nəticəsi İmran Ziyadlı şəcərəni mərasim iştirakçılarına təqdim edib, bu əsərin üzərində atası Valid Ziyadlı ilə 30 ildən artıq müddətdə axtarışlar apardıqlarını, şəcərənin 1740-cı ildən Şahverdixan Qacarın hökmranlığı dövründən indiyəqərki dövrü əhatə etdiyini və onun Müəlliflik Hüququ üzrə Dövlət Agentliyində əqli mülkiyyət kimi qeydə alındığını söyləyib.

Mərasimdə professorlar Fuad Məmmədov, Etibar Babayev, Həsənbala Sadıxov, Qəzənfər Paşayev, fəlsəfə doktoru Firdovsiyyə Əhmədova, jurnalist İsmayıl Umudlu və başqaları çıxış ediblər.