“Kuklalar”ın rejissoru evində ölü tapıldı

Azərbaycan Kinematoqrafçılar İttifaqının üzvü, kinorejissor Çingiz Rəsulzadə 49 yaşında dünyasını dəyişib.

Lent.az-ın məlumatına görə, Şağan kəndindəki mənzilində tək yaşayan rejissor bu gün səhər saatlarında qardaşı tərəfindən evində ölü vəziyyətdə tapılıb. Rejissorun ölüm səbəbi hələki dəqiqləşdirilməyib. Çingiz Rəsulzadə bu gün Şağan qəsəbəsində yerləşən qəbiristanlıqda dəfn edilib.

Qeyd edək ki, Ç.Rəsulzadə Bakıda anadan olub. Ə.Əzimzadə adına Azərbaycan Dövlət Rəssamlıq Texnikumunda (1992), Azərbaycan Dövlət Mədəniyyət və İncəsənət Universitetinin qrafik-rəssam ixtisasında, Ümumrusiya Dövlət Kinematoqrafiya İnstitutunun kinorejissorluq ixtisasında (A.Eşpay, S.Miroşniçenko və V.Fençenkonun kursu) təhsil alıb.

Rusiya istehsalı olan “Həyat haqqında mimlər” (2002) qısametrajlı bədii filminin və “Jestlər.. Barışıq” (2005) sənədli filminin rejissoru və ssenari müəllifi, “İkinci” qısametrajlı bədii filminin ssenari müəllifi, o cümlədən "Kuklalar" (2009) filminin quruluşçu rejissorudur.

Xatırladaq ki, 49 yaşlı rejissor çəkdiyi filmlərdə hər zaman müharibə mövzusuna toxunmağa çalışıb. Qarabağ müharibəsi zaman azərbaycanlı insanının çəkdiyi iztirablar, əzab əziyyətlər rejissor və sənət adamı kimi onu hər zaman narahat edib, düşündürüb.