“40-cı qapı” iki məşhur film festivalına dəvət alıb

Festivallarda rejissorla bərabər filmin prodüseri də iştirak edəcək

Azərbaycanda çəkilən “40-cı qapı” filmi iyun ayında Şanxay, iyulda isə Karlovi-Varı Beynəlxalq Film festivallarında iştirak edəcək. Bu barədə Lent.az-a filmin prodüseri, “Ritm production”un direktoru Xaqani Savalanın məlumat verib.

Festivallarda rejissorla bərabər filmin prodüseri də iştirak edəcək. Xaqani Savalanın dediyinə görə, bu festivallar A kateqoriyalıdır, dünyanın hər yerindən prodüserlər, distributorlar iştirak edirlər: “Onlarla görüşmək, fikir mübadiləsi, onların iş prinsiplərini öyrənmək, ümumilikdə bu sahə haqqında ətraflı məlumatlar, təcrübə toplamaq bu gün bizim üçün – Azərbaycanda yeni formalaşmaqda olan prodüser şirkətləri üçün çox önəmlidir”.

Qeyd edək ki, film aprel ayında 42-ci Beynəlxalq Hyuston Kinofestivalında “Ən yaxşı xarici film” nominasiyası üzrə qızıl mükafata (GOLD REMI AWARD .Foreign) layiq görülüb. Festivalın nəticələri 26 aprel 2009-cu ildə açıqlanıb.

“40-cı qapı” bədii filmi dövlət sifarişi ilə “Ritm production”da çəkilib. Filmin prodüseri Xaqani Savalan, ssenari müəllifi və rejissoru Elçin Musaoğludur. Baş rollarda Həsən Səfərov, Gülər Nəbiyeva, Rövşən Ağayev və b. çəkiliblər.