Xanımana Əlibəylinin 90 illik yubileyi qeyd olunacaq

Mədəniyyət və Turizm Nazirliyinin təşkilatçılığı ilə dekabrın 23-də Gənc Tamaşaçılar Teatrında əməkdar incəsənət xadimi, Dövlət Mükafatı laureatı Xanımana Əlibəylinin anadan olmasının 90 illiyi münasibəti ilə yubiley tədbiri keçiriləcək.

Nazirlikdən Lent.az-a verilən məlumata görə, tədbirdə Xanımana Əlibəylinin “Dovşanın ad günü” pyesinin 100-cü tamaşası nümayiş olunacaq. Yubiley tədbirində tanınmış ədəbiyyat və mədəniyyət xadimləri, ziyalılar və yazıçının qohumları iştirak edəcəklər.

Qeyd edək ki, X.Əlibəyli yarım əsri adlayan uzun və səmərəli yaradıcılıq yolu keçərək uşaq ədəbiyyatının görkəmli nümayəndəsi kimi söz sənətimizin tarixinə daxil olub. O, Azərbaycan uşaq dramaturgiyasının banisi sayılır. Bədii yaradıcılığa ötən əsrin 30-cu illərində başlayıb. İlk şeiri – “Ana” 1955-ci ildə “Azərbaycan qadını” jurnalında dərc edilib. “Balaca həkim”, “Dovşanın ad günü”, “Meşə həkimi”, “Yaz konserti” və s. kitabları nəşr olunub.

“Dovşanın ad günü”, “Ləpələrin nağılı”, “Gözəllər gözəli” və s. pyesləri Gənc Tamaşaçılar və Kukla teatrlarında tamaşaya qoyulub. “Dovşanın ad günü” və “Aycan” tamaşaları Dövlət Mükafatına layiq görülüb.
Xəyalə