Zeynal Xəlilin xatirə gecəsi keçirildi –

Lent.az-ın məlumatına görə, tədbiri AYB-nin “İrs” komissiyasının sədri Sona Xəyal açaraq 4 ildən sonra Zeynal Xəlilin 100 illik yubileyinin olacağını bildirib. Onun sözlərinə görə, bu tədbir yubileyə hazırlıq kimi qiymətləndirilə bilər.

Şair, publisist Taleh Həmid Zeynal Xəlilin həyat və yaradıcılığından söz açıb. Qeyd edib ki, Zeynal Xəlil 1914-cü ildə Gəncədə anadan olub. “İstək” adlı ilk şeirlər kitabı 1936-cı ildə nəşr edilib. Böyük Vətən müharibəsi illərində döyüşçülərin qəhrəmanlığını tərənnüm edən əsərlər yazıb. Onun “Qatır Məmməd” pyesinin motivləri əsasında eyniadlı film çəkilib: “”Zeynal Xəlilin şeirlərinə bəstələnən “Ay işığında”, “Kimlər gəldi, kimlər getdi” və digər mahnılar bu gün də sevilir. Onun özünəməxsus yaradıcılığı olub və insan sevgisi bir xətt olaraq bütün yaradıcılığı boyu keçir”.

Tədbirdə şairlərdən Nahid Hacızadə, Musa Ələkbərli, tənqidçi Vaqif Yusifli Zeynal Xəlil barədə xatirələrini bölüşüblər. Mərhumun ailə üzvləri isə tədbir təşkilatçılarına öz təşəkkürünü bildirib.

Gecədə Sona Xəyalın qələmə aldığı “Zeynal Xəlil” kitabı da təqdim olunub.

Xəyalə