Fidan Hacıyeva bir ildən sonra yenidən Karmen obrazında

Tamaşa dekabrın 4-də nümayiş olunacaq. Jorj Bizenin “Karmen” operası professor Hüseyn Əliyevin quruluşunda hazırlanır. Həmin gün operanı Azərbaycanın xalq artisti, dirijor Cavanşir Cəfərov idarə edəcək.

Fidan Hacıyevanın Lent.az-a verdiyi məlumata görə, sonuncu dəfə “Karmen” operası ilə ötən il dekabrın 5-də çıxış edib və düz bir il fasilədən sonra yenidən bu operaya müraciət edib. Sənətçi hər zaman olduğu kimi bu dəfə də Karmen sevərlərin qarşısına çıxmaq üçün ciddi şəkildə hazırlaşır. Bir müddət əvvəl İtaliyada uğur qazanan, İtaliya opera səhnələrində çıxış etmək imkanı əldə edən Fidan Hacıyeva bu uğurlarını da ifasında nümayiş etdirmək niyyətindədir: “İtaliyadakı uğurumdan sonra üzərimdə daha çox işləməli olduğumu hesab edirəm. Budəfəki çıxışımda tamaşaçılara yeniliklər və daha möhtəşəm ifa təqdim etmək fikrindəyəm”.

F. Hacıyeva onu da bildirib ki, dekabr ayında bir sıra yeniliklərlə tamaşaçıların görüşünə gələcək. Onun bu yeniliklərdən biri dekabrın 15-də verəcəyi konsertlə, digəri isə dekabrın 18-də Cüzeppe Verdinin “Trubadur” operasında Azuçena obrazında çıxış etməsi ilə bağlıdır.

Xəyalə