Azərbaycanda Türkmənistan Mədəniyyət Günləri başlayır

Mədəniyyət və Turizm Nazirliyinin mətbuat katibi Zöhrə Əliyevanın Lent.az-a verdiyi məlumata görə, 60 nəfərlik nümayəndə heyətinə Türkmənistan Milli Mədəniyyət Mərkəzinin Baş direktoru xanım Tuvakbibi Durdıyeva rəhbərlik edir. Nümayəndə heyətinə Türkmənistan İncəsənət Muzeyinin direktoru Saparmamed Meredov, “Dokmaçılar” rəqs qrupu, tanınmış müğənnilər, televiziya və KİV nümayəndələri daxildir.
Məlumata görə, qonaqlar ilk olaraq bu gün Fəxri xiyabanı və Şəhidlər xiyabanını ziyarət edəcək. Mədəniyyət günlərinin rəsmi açılış mərasimi və konsert proqramı isə noyabrın 4-də Gənc Tamaşaçılar Teatrında baş tutacaq. Proqrama əsasən, noyabrın 5-də Muzey Mərkəzində Türkmənistan rəssamları və dekorativ sənət ustalarının əsərlərindən ibarət sərgi açılacaq, Türkmənistan kinofilmləri göstəriləcək, Kukla Teatrında “Mollanepes” mono tamaşasının nümayişi olacaq. Noyabrın 6-da Muzey Mərkəzində Türkmənistan kinofilmlərinin nümayişi, Qaradağ rayonunda isə Türkmənistan Mədəniyyət Günlərinin bağlanışı və incəsənət ustalarının konserti keçiriləcək.

Xəyalə