Vasif Adıgözəlovun 75 illiyinə həsr olunmuş Musiqi Festivalı keçiriləcək

Silsilə tədbirlər 27-31 oktyabr tarixlərində baş tutacaq. Bu barədə Lent.az-a Azərbaycan Bəstəkarlar İttifaqının mətbuat katibi İltifat Hacıxanoğlu məlumat verib.

Mətbuat katibi bildirib ki, festival çərçivəsində Azərbaycan Bəstəkarlar İttifaqının Üzeyir Hacıbəyli adına Konsert Salonunda Bəstəkarın kamera-instrumental və kamera-vokal əsərləri gənc istedadların ifasında Kamera konserti keçiriləcək. Açılış Konserti 27 oktyabrda başlayacaq.

28 oktyabrda M. Maqomayev adına Azərbaycan Dövlət Filarmoniyasında Ü.Hacıbəyli adına Azərbaycan Dövlət Simfonik Orkestrinin “Çanaqqala-1915” Oratoriyası səslənəcək. Qeyd edək ki, konsertin dirijoru əməkdar incəsənət xadimi Yalçın Adıgözəlov, Azərbaycan Dövlət Xor Kapellasının bədii rəhbəri xalq artisti Gülbacı İmanovadır.

29 oktyabrda isə Azərbaycan Bəstəkarlar İttifaqının Üzeyir Hacıbəyli adına Konsert Salonunda konfrans keçiriləcək. Konfransda V.Adıgözəlovun yaradıcılığının müxtəlif sahələrinə həsr olunmuş məruzələr səsləndiriləcək.

Silsilə tədbirlər 30 oktyabrda Azərbaycan Dövlət Musiqili Komediya Teatrı “Aldın payını, çağır dayını” musiqili komediyası (libretto – Xalq yazıçısı Anar) ilə davam edəcək. Tədbir 31 oktyabr 2010-cu il Azərbaycan Dövlət Opera və Balet Teatrında göstəriləcək tamaşa ilə yekunlaşacaq.

Lalə Yusifqızı