Üzeyir Hacıbəyovun naməlum əsərləri səsləndiriləcək

Üzeyir Hacıbəyovun ev muzeyi dahi bəstəkarın 125 illik yubileyi ilə əlaqədar tədbirlər keçirməkdə davam edir. Muzeyin direktoru Sərdar Fərəcovun Lent.az-a verdiyi məlumata görə, yubiley tədbirləri çərçivəsində bəstəkarın indiyədək hələ heç yerdə səslənməyən naməlum əsərlərindən ibarət konsertin keçirilməsi planlaşdırılır. Bu məqsədlə Ü. Hacıbəyov adına Azərbaycan Dövlət Simfonik Orkestrinin bədii rəhbəri və baş dirijoru, xalq artisti, professor Rauf Abdullayevlə danışıqlar aparılır.

S. Fərəcovun sözlərinə görə, Amerika bəstəkarı Con Hayner Üzeyir Hacıbəyova həsr olunmuş əsər bəstələyib. Yubiley çərçivəsində keçiriləcək tədbirlər zamanı bu əsərin də səsləndirilməsi planlaşdırılır.

Bununla yanaşı, bəstəkarın həyat və yaradıcılığını əks etdirən bir neçə kitab da işıq üzü görəcək. Sərdar Fərəcovun qələmə aldığı “Üzeyir Hacıbəyov nasirlərin xatirələrində” və “Üzeyir işığında” kitabları artıq çapa təqdim olunub. “Şeyx Sənanın izilə” kitabı isə payızda nəşr olunacaq: “Onu da qeyd etməliyəm ki, biz bəstəkarın ev muzeyi olaraq hələ ilin əvvəlindən yubileyə hazırlaşırıq. Məsələn, yanvarda Üzeyir bəylə bağlı məlumatları özündə əks etdirən təqvim işıq üzü gördü. Mayda isə “Ər və arvad” operettası ilə bağlı konfrans keçirdik. Orada oxunan məruzələri kitab şəklində buraxdıq və müxtəlif kitabxanalara payladıq. 2010-cu il bütövlükdə yubiley ili sayıldığından, tədbirlər ilin sonuna qədər davam edəcək”.

Xəyalə Muradlı