“Hər aşıq öz səviyyəsini bilməlidir”

“Aşıq yaradıcılığının müasir problemləri” mövzusunda elmi konfrans keçirilib

Mayın 26-da Azərbaycan Dövlət Pedaqoji Universitetində Aşıqlar Birliyinin təşkilatçılığı ilə “Aşıq yaradıcılığının müasir problemləri” mövzusunda elmi konfrans keçirilib. Lent.az-ın məlumatına görə, tədbiri universitetin rektoru professor Yusif Məmmədov açaraq elmi konfransın 28 May - Respublika gününə həsr olunduğunu deyib. Sonra Respublika Günün tarixindən, Xalq Cümhuriyyətinin qurucularından danışıb.

Aşıqlar Birliyinin sədri, xalq şairi Zəlimxan Yaqub çıxışında Respublika Günündən böyük bayram tanımadığını, məhz belə bir günün qeyd olunması ərəfəsində aşıq yaradıcılığının geniş müzakirə olunmasının təsadüfü olmadığını deyib. Daha sonra aşıq sənətinin problemlərindən danışıb: “Bizi razı salan cəhətlər çoxdur. Aşıq sənətinin YUNESKO-da təsdiqilə bağlı böyük işlər görülüb. Aşıqlarımız Fransa, İngiltərə, Amerika, Rusiya kimi ölkələrdə çıxış edirlər. Amma bu və digər müsbət hallarla yanaşı problemlər də var və onlar həll olunmalıdır. Bəzi şəxslərin televiziya ekranlarında aşıq sənətini hörmətdən salan çıxışları bizi mütəəssir edir. Aşıq sənətini də gözdən salır. Hər aşıq öz səviyyəsini bilməlidir”.

Daha sonra mövzu ilə əlaqədar məruzələr dinlənilib.

Xəyalə