“Vətənim mənim”

Mədəniyyət və Turizm Nazirliyinin “Salnamə” kinostudiyasında istehsal olunan “Qarabağ qəhrəmanları” silsiləsindən dördüncü sənədli film də artıq təhvil verilib. “Salnamə” kinostudiyasından Lent.az-a verilən məlumata görə, film Azərbaycanın Milli Qəhrəmanı Koroğlu Rəhimova həsr olunub.

10 dəqiqəlik sənədli filmin ssenari müəllifi Rəfiqə Məsud, rejissoru Kəmalə Musayeva, operatoru Rüfət Süleymanovdur. Sənədli ekran əsəri Koroğlu Rəhimovun keçdiyi şücaətli döyüş yolunu əks etdirən xroniki kadrlar üzərində qurulub.

Qeyd edək ki, Koroğlu Rəhimov 1953-cü il oktyabrın 31-də doğulub. 1992-ci ildə Xocalı faciəsindən sonra Vətənin müdafiəsinə qalxıb. Goranboy və Ağdərədə gedən qanlı döyüşlərdə iştirak edib. 1992-ci il iyul ayının 3-də Ağdərədə gedən qanlı döyüşlərin birində qəhrəmancasına həlak olub.

Azərbaycan Respublikası Prezidentinin 16 sentyabr 1994-cü ildə verdiyi fərmanla Koroğlu Rəhimov ölümündən sonra “Azərbaycan Milli Qəhrəmanı” adına layiq görülüb. Bakı küçələrindən birinə onun adı verilib.

Xəyalə Muradlı