Gülüstan Əliyeva yeni albomunu təqdim etdi

Aprelin 16-da “Muğam ocağı”nda Akademik Opera və Balet Teatrının solisti, əməkdar artist Gülüstan Əliyevanın “Yadıma düşürsən” adlı yeni albomunun təqdimat mərasimi keçirilib.

Lent.az-ın məlumatına görə, deyildiyi vaxtdan saat yarım gec başlayan tədbirdə sənətçi yeni albomu barədə məlumat verib.

“STS prodakşn” tərəfindən hazırlanan albom SD və DVD-dən ibarətdir. 10 illik fasilədən sonra işıq üzü görən bu toplu Gülüstan Əliyevanın sayca 4-cü albomudur: “Bu 10 illik fasilə müddətində bekar oturmamışdım. Üç solo konsertim oldu. 4 klip çəkdim. Teatrda bir neçə yeni işim oldu. Ona görə də disk buraxmağa vaxtım yox idi. Sonradan belə bir qərara gəldik ki, bu illər ərzində ifamda sevilən və populyarlaşan bütün bəstəkar mahnılarını alboma daxil edək. Həm də artıq buna ehtiyac vardı”.

Gülüstan Əliyeva yaxın vaxtlarda xalq mahnıları və təsniflərdən ibarət “Ay bülbüllər” adlı daha bir diskinin də işıq üzü görəcəyini vurğulayıb.

Jurnalistlərin suallarını cavablandıran sənətçi gələcək planları barədə də məlumat verib. Belə ki, o, mayda Ukraynada keçiriləcək konsertdə iştirak edəcək. Bundan başqa Türk Ölkələri Akademiyası tərəfindən layiq görüldüyü beynəlxalq dərəcəli ödülün də təqdimat mərasimi baş tutacaq. O ki qaldı teatrdakı işinə, Gülüstan Əliyeva “Əsli və Kərəm”də Əsli partiyasını ifa etməyə hazırlaşır.

Xəyalə