Səkinə İsmayılova Almaniya səfərindən qayıdıb

Xalq mahnıları və muğamların tanınmış ifaçısı, xalq artisti Səkinə İsmayılova Almaniyadan səfərdən qayıdıb. Bu barədə Lent.az-a Səkinə İsmayılova özü bildirib. Xanəndə Berlində “Muğam gecəsi” adı altında 2 konsert proqramı ilə çıxış edib. Konsertlərdən biri Azərbaycanın Almaniyadakı səfirliyinin binasında, digəri isə məşhur konsert salonunda baş tutub. Hər iki konsert proqramında Səkinə İsmayılovanı tarda Əliağa Sədiyev, kamançada Elşən Mansurov müşayiət edib: “Konsertləri Azərbaycanın Almaniyadakı səfirliyi təşkil etmişdi və çox böyük uğurla keçdi. Səfirliyin binasındakı konsertdən öncə Almaniyadakı səfirimiz Pərviz Şahbazov çıxış etdi. Konsertə Almaniyanın tanınmış iş adamları, dövlət nümayəndələri, səfirliklərin işçiləri gəlmişdilər. Hər iki çıxış maraqla qarşılandı. Mənə də xoş təəssüratlar qaldı. Çünki hardasa 5-6 il idi ki, Almaniyaya getmirdim”.

Xanəndə onu da bildirdi ki, mayda ənənəvi olaraq Astarada keçirilən muğam müsabiqəsinin münsiflər heyətində bu il də təmsil olunacaq. Səkinə İsmayılova artıq 10 ildir müsabiqənin münsif kürsüsündə əyləşib.

Xəyalə