“Şəxsi aqressiyalar üzərində qurulan ədəbi nəsl sanballı əsərlər yarada bilməz”

Azərbaycan Yazıçılar Birliyinin üzvü Xəzangül Hüseynova belə hesab edir

“Bugünkü gənc ədəbi nəsl 60-70-cilər adlandırdıqları ədəbi nəslə qarşı qoç döyüşünə çıxıb, buynuzlaşmağa məqam axtarır”. Bunu Lent.az-a açıqlamasında Azərbaycan Yazıçılar Birliyinin üzvü, şairə Xəzangül Hüseynova bildirib.

“Şəxsi aqressiyalar üzərində qurulan ədəbi nəsl sanballı əsərlər yarada bilməz. Müasir ədəbi nəslin bəzi nümayəndələri az qala özünün bazisindən imtina edərək özlərinin bazis üzərində üstqurum olduğunu unudurlar”, - şairə deyib.

Hüseynova hesab edir ki, biganəlik, etinasızlıq, özlərindən yaşlı nəslə bir növ yuxarıdan aşağı baxmaq onların hobbisinə çevrilib: “Bu gün cərəyan axtarışına çıxmaqla, özündən əvvəlki ədəbi nəslin üstünə qara xətt çəkməklə sanballı əsər yaratmaq olmaz. Ona görə də müasir ədəbi zənginliyimiz, istedadlı gənclərimiz dedi-qodu ilə məşğul olanların kölgəsində can verir”.

Sağlam ədəbi tənqidin tərəfdarı olduğunu deyən Xəzangül Hüseynova hesab edir ki, bu tənqidin də bir çərçivəsi olmalıdır: “Onlar Anarı tənqid edirlər, deyirlər ki, Yazıçılar Birliyinə yeni sədr gəlməlidir, bununla da oranın ruhu dəyişəcək. Məgər qurumun ruhunun dəyişməsi üçün onun rəhbəri mütləq dəyişməlidir? Son illər nə qədər gənc istedadlı yazarlar quruma üzv ediliblər, Yazıçılar Birliyinin idarəçiliyinə gənc yazarlar cəlb edilib. Oxuculara qurumun başında kimin durması yox, sanballı əsərlər lazımdır”.
1988-ci ildən Azərbaycan Yazıçılar Birliyinin üzvü olan Xəzangül Hüseynovanın şeirləri ötən əsrin 70 - ci illərindən dərc olunub. Şairə, həmçinin ötən ildən Avrasiya Yazarlar Birliyinin üzvüdür.
Şairə yeddi şerlər kitabının müəllifidir, bunlardan biri Türkiyədə “Bitməyən xəzan”, digəri isə Tbilisidə gürcü dilində çap olunan "Şubhələr" adlı kitabdır.