Bülənt Ərsoy İlhamə Quliyevaya məktub göndərib

İlhamə Quliyeva adına Mədəniyyət Mərkəzinin açılışı oldu

Aprelin 4-də İstanbuldakı otellərin birində İlhamə Quliyeva adına Türkiyə-Azərbaycan Mədəniyyət Mərkəzinin təntənəli açılış mərasimi olub. Bu barədə Lent.az-a məlumat verən Azərbaycanın və Dağıstanın xalq artisti İlhamə Quliyeva bildirib ki, açılış mərasimində mərkəzin direktoru Sərxan Kərəmoğlu çıxış etdikdən sonra hər iki ölkənin dövlət himni səsləndirilib. Daha sonra Azərbaycanın İstanbuldakı baş konsulu Səyyad Aran açılış lentini kəsib. Tədbirdə iştirak edən Türkiyə və Azərbaycanın nüfuzlu ictimai-siyasi xadimləri, bir sıra iş adamları və incəsənət xadimləri İlhamə Quliyevanı mərkəzin açılışı münasibəti ilə təbrik ediblər, ən xoş arzularını çatdırıblar. Türkiyənin TMB kanalının rəhbəri Naim Burak Elçi çıxış edərək bildirib ki, mərkəz tez bir zamanda öz sözünü deyəcək, Türkiyə və Azərbaycanda nüfuzlu mədəniyyət ocağı kimi öz yerini tapacaq.

Tədbirdə mərkəzin ayrıca binasının olması təklifi irəli sürülüb. Konsertdə olduğu üçün açılışda iştirak edə bilməyən müğənni Bülənt Ərsoyun nümayəndəsi təbrik məktubunu tədbir iştirakçılarının diqqətinə çatdırıb. O, məktubunda mərkəzdə İlhamə xanımla ortaq konsert verməyi arzuladığını yazıb.

Mərasim İlhamə Quliyevanın çıxışı ilə yekunlaşıb.

Qeyd edək ki, hazırda İstanbulda səfərdə olan İlhamə Quliyeva Türkiyənin bir sıra kanallarına dəvət alıb, nüfuzlu verilişlərin qonağı olacaq.

Leyla