İstanbulda mühüm mədəniyyət tədbiri

“İstanbul-Avropa Mədəniyyət Paytaxtı-2010” Mədəniyyət ilinin rəsmi açılışı Türkiyə prezidenti və baş naziri elan edəcək.
Yanvarın 16-da Haliç Konqres Mərkəzində “İstanbul-Avropa Mədəniyyət Paytaxtı - 2010” Mədəniyyət ilinin təntənəli açılış mərasimi gerçəkləşəcək. Mədəniyyət və Turizm Nazirliyinin mətbuat katibi Zöhrə Əliyevanın Lent.az-a verdiyi məlumata görə, açılış mərasimi ilə eyni vaxtda bütün mərasim tədbirləri İstanbulun daha 6 mərkəzi meydanında baş tutacaq. Haliç Konqres Mərkəzində 65 dəqiqəlik “İstanbul Sehri” adlanan açılış gecəsində dünyanın bir çox ölkəsindən 5 minə yaxın qonaq – yüksək dövlət və siyasət, sənət və mədəniyyət adamları iştirak edəcək.
Mədəniyyət ilinin rəsmi açılışı Türkiyə Prezidenti Abdulla Gül və Baş Nazir Rəcəb Tayyib Ərdoğan tərəfindən elan olunacaq. “İstanbul-Avropa Mədəniyyət Paytaxtı-2010” Mədəniyyət ilinin açılış mərasimində iştirak etmək üçün Azərbaycanın mədəniyyət və turizm naziri Əbülfəs Qarayev bu gün İstanbula yola düşüb.
Xəyalə Muradlı