Xalq artisti və qızı Edinburqda

Görkəmli muğam ustadı, xalq artisti Alim Qasımov və qızı Fərqanə Qasımova Böyük Britaniyanın Edinburq şəhərində qastrol səfərdədirlər. Bu barədə məlumatı Lent.az-a sənətkarın meneceri Səadət xanım bildirib. Onun sözlərinə görə, artıq bir neçə gündür ki, İngiltərədə olan sənətçilər burada konsert proqramı ilə çıxış ediblər. Hər il ənənəvi olaraq, Edinburqda keçirilən musiqi festivalında iştirak edən musiqiçilərimizin budəfəki proqramları daha zəng olub. Belə ki, builki festival 2012-ci il London Yay Olimpiya Oyunlarına həsr olunub.

Festivalda xanəndələrimiz bir neçə konsert proqramı ilə çıxış ediblər. Həmçinin 75 dəqiqəlik master klass keçiblər.

Bu gün isə xanəndələrimiz ayrı-ayrı şəhərlərdə daha iki konsert proqramı ilə çıxış edəcəklər. Konsertlərin biri 25, digəri isə 60 dəqiqə olacaq. Musiqiçilərimiz “ Sevgilim”, “Mahur”, “Dağların başı” və digər musiqiləri səsləndirəcəklər.

Xalq artistimiz və qızı sabah Bakıya dönəcək. Xanəndələrimizin növbəti səfərləri isə Polşaya olacaq.

Jalə