Dünyanın ən çirkli şəhəri: Orada nəfəs almaq TƏHLÜKƏLİDİR

Təsəvvür etmək çətindir ki, mavi planetimizda hava ilə nəfəs almağın həyat üçün təhlükəli olduğu bir yer var. Söhbət mədənlərdən yox, Vyetnamın paytaxtı Hanoydan gedir.

Lent.az xarici KİV-ə istinadən xəbər verir ki, Ümumdünya Səhiyyə Təşkilatının mütəxəssisləri bununla bağlı həyəcan təbili çalır.

Hanoyda hava o qədər çirklənib ki, oradakı zərərli maddələrin konsentrasiyası icazə verilən təhlükəsizlik səviyyəsindən 24 dəfə çoxdur. Dərc edilən son araşdırmalar göstərir ki, dünyada bir milyondan çox ölüm havanın çirklənməsinə səbəb olan kiçik hissəciklərin qısamüddətli təsiri ilə bağlıdır. Üstəlik, çirkli hava ilə bağlı ölümlərin yarıdan çoxu Şərqi Asiyada baş verir.

Bu göstəricilərə görə, Hanoy Yer kürəsinin ən çirkli şəhəridir. Burada 9 milyona yaxın insan yaşayır. Burada havada PM2.5 mikrotozunun konsentrasiyası Ümumdünya Səhiyyə Təşkilatının təhlükəsiz hesab etdiyi səviyyədən 24 dəfə yüksəkdir. PM2.5 hissəcikləri xərçəng, insult və digər xəstəliklərin inkişafına səbəb olur.

Vyetnam paytaxtının qlobal antireytinqə daxil edilməsinin əsas səbəbləri tikinti, avtomobil nəqliyyatı, kömür elektrik stansiyaları və kənd təsərrüfatı tullantılarının yandırılmasıdır. Hanoy əhalisinin demək olar ki, yarısı sağlamlıq üçün təhlükəli olan havanı nəfəs almağa məcburdur.