Azərbaycanlı qrup “Yetenek sizsiniz Türkiyə”nin yarımfinalında

Azərbaycanı “Yetenek sizsiniz Türkiyə” televiziya müsabiqəsində təmsil edən “Crazy Eyes” rəqs qrupu daha bir uğura imza atıb. Bunu Lent.az-a qrupun rəhbəri Arif Məmmədov deyib. Onun sözlərinə görə, qrup artıq yarışmanın ikinci turunda iştirak edib:

“Çəkilişlər İzmir şəhərində keçirildi. 2-ci turun şərtlərinə görə, yarımfinal mərhələsinə keçən iştirakçını tamaşaçı zalı səsvermə yolu ilə müəyyən edirdi. Bu səfər qrupumuz 6 rəqqas və 2 musiqiçi ilə xüsusi nömrə hazırlamışdı. Milli alətlərin canlı müşayiəti ilə “hip-hop” rəqslərin sintezi həm münsiflər heyəti, həm də tamaşaçıları heyrətləndirdi. Layihənin rəhbəri Acun İllacalı qrupun rəqsinin 2-ci tur üçün daha yaxşı olduğunu və daha yuxarı tura layiq olduğunu qeyd etdi. Alp isə bu yarışmanın tarixi boyu hələ belə rəqs qrupu görmədiyini bildirdi. Bütün bunlar həqiqətən bir uğurdur və bizi sevindirməyə bilməzdi. Sonda tamaşaçıların səsverməsi ilə qrupumuz həftə birincisi oldu və yarımfinala vəsiqə qazandı”.

Qeyd edək ki, “Crazy Eyes” rəqs qrupunun bu uğurunu televiziya tamaşaçıları yanvarın 18-i yerli vaxtla 22:00-da Türkiyənin “Star” telekanalının “Yetenek sizsiniz” verilişində izləyə biləcəklər.