“Eurovision” milli seçim turunda yarımfinalçılar bəlli oldu

Ötən gün "Böyük Səhnə", “Evrovision” milli seçim turunun ikinci konsert proqramı baş tutub. Lent.az-ın məlumatına görə, müsabiqəsinin ilk şousundan növbəti mərhələyə vəsiqə qazanan 10 ifaçı səs və səhnə imkanlarını yenidən İctimai Televiziyanın efirində nümayiş etdiriblər. Onların arasından 6 iştirakçı yarımfinala keçib.

Müsabiqənin şərtlərinə əsasən münsiflər heyətindən 46–dan çox xal toplayan iştirakçılar birbaşa növbəti mərhələdə yarışmaq hüququ qazanıblar. Bunlardan Erkin Osmanlı, Azad Şabanov, Samirə Əfəndiyeva, Dilarə Kazımova və Xana Həsənova bu imkandan yararlanaraq, birbaşa yarımfinala keçiblər. Yarış qaydalarına uyğun olaraq, münsiflərin qərarı ilə Elton İbrahimov yarışmanın “təhlükəli zolağı”ndan çıxarılaraq, yarımfinala keçmək şansı əldə edib.

Xatırladaq ki, Gənclər və İdman Nazirliyinin dəstəyi ilə reallaşdırılan “Böyük Səhnə” layihəsinin yarımfinalı fevralın 23-də, saat 23.00-da İctimai Televiziyanın efirində yayımlanacaq.

Qeyd edək ki, müsabiqənin qalibi isə martın 2-də keçiriləcək final şousunda elan olunacaq və həmin ifaçı Azərbaycanı Danimarkada keçiriləcək "Eurovision-2014"də təmsil edəcək.