Ərini sifarişlə öldürtmüşdü, məhkəməsi başlayır...

Bakı Ağır Cinayətlər Məhkəməsində paytaxtda sifarişlə qətl törədən mütəşəkkil dəstənin cinayət işi üzrə məhkəmə prosesi başlayıb.

Lent.az-ın məlumatına görə, hakim Səyavuş Hacıyevin sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib.

Təqsirləndirilən şəxs Əzizə Seyidlinin vəkili vəsatətlə çıxış edib.

O bildirib ki, ibtidai istintaqda Əzizə Seyidli təzyiqlərə məruz qalıb, üzləşmə prosesi keçirilməyib:

"Təqsirləndirilən Mehdi Məmmədov ibtidai istintaqa ifadəsində qətlə yetirilən adamla şəxsi münaqişəsi olduğunu və bu işin Əzizə Seyidli ilə heç bir əlaqəsinin olmadığını desə də, müstəntiq bu ifadəni nəzərə almayıb. Müstəntiqə dəfələrlə üzləşmə keçirilməsini xahiş etsəm də, o, heç bir üzləşmə keçirmədi. Mehdi Məmmədovla görüşüb danışdığım protokollaşdırılmadı və işə əlavə edilmədi. Məhkəmədən xahiş edirəm, bu nüanslar nəzərə alınsın".

Müşavirədən sonra məhkəmənin baxış iclası avqustun 16-na təyin olunub.

İttihama görə, hadisə bu il martın 16-da Sabunçu rayonunda baş verib.

Həmin gün 0:05-də 30 yaşlı Əli Seyidlinin yaşadığı fərdi yaşayış evinin qarşısında öldürülməsi ilə bağlı rayon prokurorluğuna məlumat daxil olub.

Keçirilmiş istintaq-əməliyyat tədbirləri nəticəsində cinayət əməlinin zərərçəkmişin arvadı 23 yaşlı Əzizə Seyidovanın təşkilatçılığı ilə 42 yaşlı Mehdi Məmmədov, 35 yaşlı Elnur Əliyev və 28 yaşlı Bəxtiyar Fərzəliyev tərəfindən törədilməsinə əsaslı şübhələr müəyyən edilib.

Toplanmış sübutlar əsasında cinayətin Əli Seyidlinin arvadı Əzizə Seyidovanın sifarişi əsasında Mehdi Məmmədov, Bəxtiyar Fərzəliyev və Elvin Əliyev tərəfindən qabaqcadan əlbir olan bir qrup şəxs halında törədilməsinə əsaslı şübhələr müəyyən edilib.

Əzizə Seyidovaya Cinayət Məcəlləsinin 32.3, 32.4, 120.2.1, 120.2.4, 120.2.5-ci (qabaqcadan əlbir olan bir qrup şəxs halında, xüsusi amansızlıqla, tamah məqsədilə və sifarişlə qəsdən adam öldürməyə təhrik etmə və cinayəti təşkil etmə), Mehdi Məmmədov, Bəxtiyar Fərzəliyev və Elvin Əliyevə isə həmin Məcəllənin 120.2.1, 120.2.4, 120.2.5-ci (qabaqcadan əlbir olan bir qrup şəxs halında, xüsusi amansızlıqla, tamah məqsədilə və sifarişlə qəsdən adam öldürmə) maddələri ilə yekun ittiham elan edilərək cinayət işi baxılması üçün aidiyyəti üzrə Bakı Ağır Cinayətlər Məhkəməsinə göndərilib.