"Bravo" işində təqsirli bilinən İFADƏ VERDİ: "Heç birini tanımıram"

Bakıda "Bravo" hipermarketində baş vermiş silahlı insidentlə bağlı cinayət işi üzrə məhkəmə prosesi keçirilib.

Lent.az xəbər verir ki, Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə təqsirləndirilən Azər Məmmədov ifadə verib.

O, ifadəsində hadisədən xəbərsiz olduğunu və onunla birliklə tutulan şəxsləri tanımadığını deyib:

"Bakıya işləmək üçün gəlmişəm. Hadisədən təxminən 1 il qabaq idi. Ruhlanla internetdə elan saytında tanış oldum. Ruhlan mopedini satırdı. Elə 2-3 dəfə onunla mopedlə bağlı danışdıq. Sonra 3-cü mikrorayonda təmir sexi açdım. Ruhlanı da bu işi bilən adam kimi çağırdım. 1-2 ay təmir sexində işlədi. Daha sonra az-az gəldi və işdən çıxdı. Ancaq ayda 1-2 dəfə sexə gəlirdi”.

Onun sözlərinə görə, hadisədən bir gün qabaq Ruhlan həmin təmir sexinə gəlib:

“Rayondan gəldiyini, maşının xarab olduğunu dedi, özü bacarırdı deyə elə sexdə düzəltdi. Hadisə günü Babək prospektində ehtiyyat hissələri satılan mağazaya gəldim. Elə orda idim ki, Ruhlan mənə zəng elədi. Vəziyyətinin yaxşı olmadığını, onu evdən şəhərə apara biləcəyimi soruşdu. Əlimdə işim olduğunu desəm də, yenə də ürəyim dözmədi getdim. Ruhlan gəldi əlində paltar və sumka var idi. Rəngi ağarmışdı və çox həyəcanlı idi. Tarqovuya aparmağımı istədi. Tarqovuya çatdıq yol tıxac idi deyə, dediyi yerə tam çatmamış düşdü. Mən də sexə gəldim”.

O, müxtəlif nömrələrdən ona zəng gəldiyini bildirib:

“2-3 saat sonra müxtəlif nömrələrdən zənglər gəlməyə başladı. Axırda 211-lə başlayan nömrədən zəng gəldi. Dedim məni niyə axtarırsız. Mənə şəkil atdılar Ruhlanın maşınını işarələmişdilər ki, tanıyırsan bu adamı. Dedim hə. Gəldilər məni götürüb, Ruhlanı düşürdüyüm yerə apardılar".

Azər Məmmədov soyğundan heç bir xəbəri olmadığını deyib.

Məhkəmə prosesi yanvarın 10-da davam etdiriləcək.

Xatırladaq ki, hadisə martın 4-də qabaqcadan əlbir olan bir qrup şəxs tərəfindən paytaxtın Xətai rayonu ərazisində yerləşən “Bravo” hipermarketində qeydə alınıb. Edilən silahlı basqın nəticəsində xidməti vəzifəsini yerinə yetirərək orada quraşdırılmış “Unibank Kommersiya Bankı” ASC-yə məxsus bankomata pul vəsaitlərini yerləşdirən Samir Şaydayevə ağır xəsarət yetirilib. Onun mühafizəsini təşkil edən Rüfət Həşimovun isə öldürülərək, külli miqdarda pul vəsaiti ələ keçirilib.

Cinayət işi üzrə toplanmış mötəbər sübutlar əsasında 6 nəfər - 1 şəxs qabaqcadan əlbir olan bir qrup şəxs halında və quldurluqla əlaqədar xidməti vəzifəsini yerinə yetirən şəxsi qəsdən öldürmə, eləcə də öldürməyə cəhd etməyə görə, 3 şəxs eyni əməllərinin törədilməsinə köməkliyə görə, 1 şəxs qabaqcadan əlbir olan bir qrup şəxs halında odlu silah hazırlamağa köməkliyə görə, 1 şəxs isə bu cinayət əməlini törətməyə təhrik etməyə görə cinayət məsuiyyətinə cəlb edilib.

Belə ki, cinayəti icra etmiş Dəyanət Qudrətova Cinayət Məcəlləsinin 120.2.1, 120.2.3, 120.2.11 (qabaqcadan əlbir olan bir qrup şəxs halında və quldurluqla əlaqədar xidməti vəzifəsini yerinə yetirən şəxsi qəsdən öldürmə), 29, 120.2.1, 29, 120.2.3, 29, 120.2.7, 29, 120.2.11 (qabaqcadan əlbir olan bir qrup şəxs halında, ümumi təhlükəli üsulla və quldurluqla əlaqədar xidməti vəzifəsini yerinə yetirən iki şəxsi qəsdən öldürməyə cəhd), 181.3.2 (sağlamlığa ağır zərər vurmaqla quldurluq), 228.2.1, (qanunsuz olaraq odlu silah, onun komplekt hissələri və döyüş sursatını əldə etmə, daşıma və gəzdirmə), 229.2.1 (qabaqcadan əlbir olan bir qrup şəxs tərəfindən odlu silah hazırlama) və digər maddələri ilə cinayət işi açılıb. Cinayətin törədilməsində köməkçilər - Azər Məmmədov, İbrahim İbrahimov və Səbuhi Qurbanova həmin Məcəllənin 32.5, 120.2.1, 32.5, 120.2.3, 32.5, 120.2.11, 32.5, 29, 120.2.1, 32.5, 29, 120.2.3, 32.5, 29, 120.2.11, 32.5, 29, 120.2.7, 32.5, 181.3.2, 228.2.1, 229.2.1 və digər maddələri, cinayətin törədilməsində köməkçi - Rövşən İsmayılova həmin Məcəllənin 228.2.1 və 32.5, 229.2.1-ci, cinayətin törədilməsində təhrikçi Babək İsgəndərova isə qeyd olunan Məcəllənin 228.2.1 və 32.3, 229.2.1-ci maddələri ilə ittiham elan edilib.

Həyata keçirilən təxirəsalınmaz istintaq-əməliyyat tədbirləri nəticəsində cinayətin törədilməsində iştirak edən Ruhlan İsmayılov tutularkən polis əməkdaşlarına qarşı silahlı müqavimət göstərdiyi üçün zərərsizləşdirilib.

Ruhlan İsmayılovun qeyd edilən cinayətdə təqsiri istintaq zamanı tam sübuta yetirilsə də onun barəsində yeni xarakterli xüsusatlar aşkar edildiyinə görə, barəsində cinayət işi ayrılaraq istintaqı davam etdirilir.

Cinayətin törədilməsində istifadə edilən AKS Lancaster-03” markalı yivsiz ov tüfəngi, “Makarov” tipli tapança, həmçinin təqsirləndirilən şəxslərin yaşadığı ünvandan “Minta37” markalı tapança, çoxsaylı döyüş sursatları, “Unibank Kommersiya Bankı” ASC-yə məxsus 16 min 835 manat və 20 min 100 ABŞ dolları məbləğində pul vəsaitləri aşkar edilərək götürülüb.