Ana qətl törədən oğlunu polisə verdi - Ömürlük CƏZA

Böyük Britaniyada 19 yaşlı Coşua Delbono daha bir yeniyetməni bıçaqla qətlə yetirməkdə təqsirli bilinərək ömürlük həbs cəzasına məhkum edilib.

Lent.az xarici mediaya istinadla bildirir ki, onun bu əməli barədə anası hüquq-mühafizə orqanlarına məlumat verib. Anasının sözlərinə görə, oğlu başqa bir yeniyetməni, 16 yaşlı Çarli Beysi bıçaqlayaraq öldürüb. Bundan sonra onun oğlu n polis tərəfindən saxlanılıb. Məlum olub ki, o, ötən yay Radstok şəhərindəki avtodayanacaqda bıçaqla bir neçə dəfə 16 yaşlı Çarliyə ölümcül zərbələr vurub.

Sinəsindən və qolundan yaralanan yeniyetmə 30 dəqiqə sonra ölüb. İstintaq, Delbononun daha sonra yaxınlıqdakı gölə gedib bıçağı ora atdığını və hücum zamanı geyindiyi paltarların bir hissəsini yandırdığını müəyyən edib.

Delbono 16 yaşlı gənci bıçaqladığını etiraf etsə də, qətli inkar edib və dostunu müdafiə etmək üçün hərəkət etdiyini təkid edib. Məhkəmənin qərarı ilə o, ömürlük həbs cəzasına məhkum edilib.