Dəmir yolu ilə beynəlxalq sərnişindaşıma tarifləri 10,2 faiz azalıb

Komitədən Lent.az-a verilən məlumata görə, oktyabr ayında nəqliyyat sektorunda yükdaşıma tarifləri 103,8 faiz, sərnişindaşıma tarifləri isə 100,5 faiz təşkil edib. Dəmir yolunda yükdaşıma tariflərinin yerli əlaqə üzrə 15,1 faiz, digər ölkələrdən gətirilmə üzrə 4,2 faiz, digər ölkələrə göndərilmə üzrə 1,3 faiz, tranzit yüklərin daşınması üzrə 0,4 faiz bahalaşması nəticəsində ümumilikdə dəmir yolunda yükdaşıma tariflərində 4,3 faiz artım müşahidə olunub. Dəmir yolu vasitəsilə beynəlxalq əlaqədə sərnişindaşıma tarifləri 10,2 faiz azalıb. Dəniz nəqliyyatı vasitəsilə MDB ölkələrinə yükdaşıma tarifləri 0,2 faiz ucuzlaşıb.

Hava nəqliyyatında MDB ölkələrinə yükdaşıma və sərnişindaşıma tarifləri müvafiq olaraq 0,9 və 5,0 faiz, uzaq xaricə sərnişindaşıma tarifləri isə 3,1 faiz artıb. Boru kəməri nəqliyyatında yükdaşıma tarifləri 0,7 faiz ucuzlaşıb.

Avtomobil nəqliyyatında yükdaşıma tarifləri yerli əlaqədə 32,5 faiz, şəhərətrafı və şəhərdaxili yükdaşıma 33,0 faiz, işəmuzd tarif 25,4 faiz artıb. Bir saatlıq işə görə yükdaşıma tarifi isə 3,1 faiz aşağı düşüb.

Elxan SALAHOV