“Milyonçu ol” depozit kampaniyasının qalibi 150 min manat alacaq

“Milyonçu ol” depozit kampaniyası çərçivəsində “Unibank” əmanətçiləri arasında martın 18-də müəyyənləşdiriləcək qalibin pul mükafatı 150 min manat təşkil edəcək.

Stimullaşdırıcı lotereya kimi qeydə alınan bu kampaniyada ödəniləcək mükafatın sahıbı, müstəqil müşahidəçilərin nəzarəti altında, təsadüfi kompüter seçimi üsulu ilə, özəl telekanalların canlı efirində açıqlanacaq. Qeyd edək ki, lotereya üsulu ilə oynanılacaq mükafatın depozit kampaniyası zamanı cəlb olunan əmanətlərin məcmu həcmindən asılı olduğundan, Bank onun zəmanət verilmiş məbləğini 150 min AZN həcmində müəyyən edib.

“Milyonçu ol!” depozit kampaniyası Bank tərəfindən, ötən ilin mart ayının 30-dan iyul ayının 31-ə kimi, xüsusi olaraq fərdi əmanətçilər üçün, onlar üçün əlverişli olan şərtlərlə, keçirilirdi. Bu zaman, hər bir “Milyonçu” depoziti sahibi, Azərbaycanda ilk dəfə olaraq, maksimal məbləği 1 milyon manat səviyyəsində elan olunan pul vəsaitini udmaq imkanı əldə edirdi.

Pul mükafatının oynanılmasında iştirak etmək üçün, 1000 AZN-dan, ABŞ dollarından və ya Avrodan az olmayan həcmdə əmanət yatırmaq və depoziti mükafatın oynanılması anına – 2010-cu ilin mart ayının 18-nə kimi hesabında saxlamaq lazım idi. “Milyonçu” depozitində olan hər bir min AZN, ABŞ dolları və ya Avro “Unibank” tərəfindən qələbəyə 1 şans kimi nəzərə alınır.

Xatırladaq ki, 2004-2006-cı illərdə “Unibank”, ölkədə ilk dəfə əmanətçilər arasında qızıl külçə uduşu keçirmiş bank olmuşdu, 2008-ci ildə isə Bank birinci olaraq depozit əmanətçiləri arasında brilyant uduşu keçirməyə başlamışdı.