İdman dırmanması üzrə Respublika Çempionatının finalı keçirilib

İdman dırmanması üzrə Respublika Çempionatının finalı keçirilib.

APA TV-nin xəbərinə görə, Gənclər və İdman Nazirliyi, Azərbaycan Hava və Extremal idman növləri federasiyasının təşkilatçılığı ilə keçirilən yarışda bouldering, çətinlik sürət növlərində olub. 91-i oğlan, 26-sı qız olmaqla ümümilikdə yarışda 117 nəfər iştirak edib. 7 regiondan 24 komandanın nümayəndələri yarışıblar. Sonda hər 3 növ üzrə yüksək nəticə göstərən iştirakçılar mükafatlandırılıb. Belə yarışlar 2 şəraitdə keçirilir, açıq havada qayalıqda və xüsusi idman zallarında.

Yarışın kişilər arasında keçirilən ilkin mərhələsində paytaxt təmsilçiləri ilə yanaşı, Gəncə, Qusar və Qaxdan gələn idmançılar güc və əzmlərini nümayiş etdirdilər.

Çempionatda Azərbaycanın müxtəlif bölgələrindən olan idman klublarının idmançıları ilə yanaşı, xarici idmançılar da iştirak edir.

Azərbaycanda ilk dəfə İdman Dırmanması üzrə Dünya kuboku yarışı bu ilin iyun ayında Dövlət Bayraq Meydanında keçirilib. Çempionatın keçirilməsində əsas məqsəd ölkəmizdə ekstremal idman növlərini, o cümlədən idman dırmanmasını populyarlaşdırmaq və gələcəkdə beynəlxalq yarışlarda Azərbaycanı layiqincə təmsil edə biləcək idmançılar yetişdirməkdən ibarətdir.