FAİREX “Zəfər-2013”ü aldı

Azərbaycan Hava və Ekstremal İdman Növləri Federasiyası (FAİREX) "Zəfər-2013" Yüksək İdman Nailiyyətləri Mükafatına layiq görülüb. FAİREX-in mətbuat xidmətindən Lent.az-a verilən məlumata görə, qurum bu mükafata “Dağ idmanının inkişafındakı xidmətlərinə görə” nominasiyasında sahib olub.

“Zəfər-2013”ü Gənclər və İdman Nazirliyi, Milli Olimpiya Komitəsi, Beynəlxalq İdman Jurnalistləri Assosiasiyası və “Sportsman” jurnalı birgə təsis edib. Tədbirdə Azərbaycanın görkəmli idman mütəxəssisləri, tanınmış idmançılar, nazirlik, komitə və şirkətlərin səlahiyyətli nümayəndələri iştirak edib.

Qeyd edək ki, “Zəfər” Yüksək İdman Nailiyyətləri Mükafatı 2008-ci ildə təsis edilib. Formata əsasən, hər ilin yekununda müxtəlif nominasiyalar üzrə ilin qalibləri adına layiq görülmək üçün milli federasiyalar və idman klubları tərəfindən namizədlər irəli sürülür. Seçim Komissiyası respublikanın görkəmli idman mütəxəssisləri, tanınmış idman jurnalistlərindən təşkil olunur.