Azərbaycanlı boksçu Aloyana qarşı

Azərbaycanın “Baku Fires” klubu WSB (Ümumdünya Boks Seriyası) Liqasında növbəti görüşünü dekabrın 14-də keçirəcək. Lent.az-ın məlumatına görə, komandamız Sankt-Peterburqda Rusiyanın qonağı olacaq.

Şimal qonşumuz 3 görüşdən 4 xal toplayaraq, qrupda 4-cü yeri tutur. “Baku Fires” isə 6 xalla 3-cü pillədədir. Rusiya komandası son turda səfərdə “Cuba Domaderos”a 0:5 hesabı ilə məğlub olub.

Komandaların heyətləri artıq məlumdur:

Rusiya - “Baku Fires”

52 kq. Mişa Aloyan - Rauf Ağayev

60 kq. Adlan Abduraşidov – Xurşid Tocibayev

69 kq. Aleksandr Besputin – Yevgeni Ramaşkeviç

81 kq. Dmitri Bivol – Mixail Dolqolevets

91+ kq. Sergey Kuzmin – Hacı Murtuzəliyev

Rusiya komandası cari mövsümdə güclü heyəti ilə seçilir. Bu dəfə rəqib komandada Aloyan və Kuzmin kimi tanınmış boksçular rinqə çıxacaq. Milliyətcə yezidi kürdü olan Aloyan 2011-ci ildə Bakıda keçirilmiş dünya çempionatının qalibi olub. O, 2012-ci il London Yay Olimpiya Oyunlarının bürünc mükafatçısıdır. Aloyanın rəqibi olan Rauf Ağayev isə WSB Liqasında debüt edəcək. Ağayev əvvəllər peşəkar rinqdə bir neçə döyüş keçirib.

Super ağır çəki dərəcəsində mübarizə aparan Sergey Kuzmin 2010-cu ilin Avropa çempionudur. Bu il Belarusun paytaxtı Minskdə keçirilmiş qitə çempionatında isə Kuzmin finalda milli komandamızın üzvü Məhəmmədrəsul Məcidova uduzub.

Rusiya komandasının heyətində Aleksandr Besputin də 2013-cü ilin Avropa çempionatında qızıl medal qazanıb.

Bu görüşdə “Baku Fires”in heyətində Ağayevdən başqa Ramaşkeviç və Dolqolevets debüt edəcəklər.