AFFA 3 baş hakimi cəzalandırdı

Rəhim Həsənov və Orxan Məmmədova təyinat verilmədi, Rauf Cabbarov isə əlavə köməkçi hakim oldu

Futbol üzrə Topaz Premyer Liqasında IV turun hakim təyinatları açıqlanıb. Lent.az-ın Peşəkar Futbol Liqasının rəsmi saytına istinadən verdiyi məlumata görə, qarşıdakı turun 5 oyunundan 2-də 6 hakimin xidmətindən istifadə olunacaq.

Bu üsul “Xəzər Lənkəran” – “Neftçi” və “Qəbələ” – “Qarabağ” matçlarına şamil ediləcək. “Böyük oyun”u idarə edəcək Fariz Yusifova Azər Əsgərov və Elman Musayev yan xətt, Ramiz Məhərrəmov 4-cü hakim, Vüsal Əliyev və Ramil Əhmədov əlavə köməkçi hakimlər qismində yardımçı olacaqlar. Qəbələdəki görüşdə isə gənc FİFA referisi Əliyar Ağayev iş başında olacaq. Mehman Mahmudov və Vaqif Musayev laynsmanlar, Sərxan İsmayılov 4-cü hakim, Feyzulla Feyzullayev və Rauf Cabbarov əlavə köməkçi hakim funksiyasını yerinə yetirəcəklər.

Digər tərəfdən, ötən tur “Qarabağ” – “Xəzər Lənkəran” matçını idarə etmiş Rəhim Həsənov və “Sumqayıt” – “Qəbələ” görüşünün baş hakimi Orxan Məmmədova təyinat verilməyib. “İnter”in AZAL-la görüşdən sonra narazı qaldığı Rauf Cabbarov isə əlavə köməkçi hakim olacaq.

Bu oyunlardan ilk 2-də qonaq komandalar, 3-cüsündə isə ev sahibləri hakimlikdən narazı qalıblar. AFFA Hakimlər Komitəsi etirazların bir hissəsi ilə razılaşıb. Həsənov və Məmmədovun bu dəfə kənarda qalmaları onların sərt, Cabbarovun isə əlavə köməkçi hakim olması nisbətən yüngül cəzalandırılmasından xəbər verir. Digər tərəfdən, qarşıdakı turda Vüsal Əliyev həm də AZAL – “Sumqayıt” matçının baş hakimi olacaq. Bunu isə Premyer Liqada baş hakim qıtlığının yaranmasının əlaməti kimi başa düşmək olar.

Qeyd edək ki, ötən tur “Neftçi” “Simurq”la görüşün baş hakimi Əliyar Ağayevdən narazı qalmışdı. Amma Ağayevin qarşıdakı turun mərkəzi oyunlarından birinə təyinat alması flaqmanın etirazlarının əsassız sayıldığını dolayısı ilə təsdiqləyir.

23 avqust (cümə)

19:00. AZAL (Bakı) – “Sumqayıt”
Hakimlər: Vüsal Əliyev, İsgəndər Əliyev, Zeynal Zeynalov, Ömər Paşayev
Bakı, “AZAL Arena”

24 avqust (şənbə)

19:00. “Simurq” (Zaqatala) – “Bakı”
Hakimlər: Ramil Diniyev, Mübariz Haşımov, Yaşar Abbasov, Ziya Nəsirov
Bakı, “Şəfa” stadionu

25 avqust (bazar)

20:00. “Xəzər Lənkəran” – “Neftçi” (Bakı)
Hakimlər: Fariz Yusifov, Azər Əsgərov, Elman Musayev, Ramiz Məhərrəmov
Əlavə köməkçi hakimlər: Vüsal Əliyev, Ramil Əhmədov
Lənkəran şəhər stadionu

20:00. “Rəvan” (Bakı) – “İnter” (Bakı)
Hakimlər: Elvin Əsgərov, Namiq Hüseynov, Rza Məmmədov, Namiq Bəkirov
Bakı, “Bayıl Arena”

18:00. “Qəbələ” – “Qarabağ” (Ağdam)
Hakimlər: Əliyar Ağayev, Mehman Mahmudov, Vaqif Musayev, Sərxan İsmayılov
Əlavə köməkçi hakimlər: Feyzulla Feyzullayev, Rauf Cabbarov
Qəbələ şəhər stadionu.