“Xəzər Lənkəran” daha bir futbolçu aldı

"Xəzər Lənkəran" klubu qış “transfer pəncərəsi”nin son günündə daha bir futbolçunu heyətinə qatıb. Lent.az-ın klubun rəsmi saytına istinadən məlumatına görə, braziliyalı yarımmüdafiəçi Elias Ribeiro de Oliveira ilə 1,5 illik müqavilə bağlanılıb.

San-Pauluda futbola başlayan 30 yaşlı yarımmüdafiəçi ölkəsinin "Bahia" klubunun yetirməsidir. "Vasko da Qama" və "Fluminense"də az müddət çıxış edəndən sonra Elias 3 il "Atletico Qoainense"nin şərəfini qoruyub. Birləşmiş Ərəb Əmirliklərinin "Əl-Əyn" klubunda qısa legioner həyatı sürməsinin ardından futbolçu "Fiqeyrense"də çıxış edib.

Son iş yeri Braziliya A Seriyası təmsilçisi "Atletiko Paranaense" olan Elias mövsümün ilk yarısını icarə əsasında digər elita təmsilçisi "Ponte Preta"nın heyətində keçirib.

Qeyd edək ki, “Xəzər Lənkəran” daha öncə Slavik Alxasov, Orxan Əliyev, Vyekoslav Tomiç, Tyeqo de Jesus və Deyan Blajevski ilə də münasibətlərini rəsmiləşdirib.