PSJ-də Mbappeni o əvəzləyəcək

Paris Sen-Jermen klubu “Barselona”nın hücumçusu Usman Dembele ilə maraqlanır və onu Kilian Mbappenin əvəzedicisi kimi nəzərdən keçirir.

Lent.az xarici mediaya istinadla bildirir ki, İspaniya komandasının futbolçusu PSJ-nin yeni baş məşqçisi Luis Enrikeni bəyənir. Qeyd olunur ki, hücumçunun “Barselona” ilə müqaviləsində 2023-cü ilin iyul ayının sonuna kimi 50 milyon avroluq sərbəst buraxılma maddəsi var.

Fransız hücumçu 2017-ci ildə “Borussiya Dortmund”dan “Barselona”ya keçib. Onun klubla müqaviləsi 2024-cü ilin yayında başa çatır.

Ötən ilin mayında mətbuatda Mbappenin PSJ ilə 2024-cü ilin yayına qədər qüvvədə olan yeni müqavilə imzaladığı barədə məlumatlar yayılmışdı. Eyni zamanda, digər mənbələr futbolçunun artıq “Real Madrid”lə müqavilə imzaladığını bildirib. Nəticədə İspaniya klubuna yüksək profilli keçid baş tutmadı.

Bu il Mbappenin “Real Madrid”ə keçidi ilə bağlı söhbətlər təzələnib. O, parislilərlə yeni müqavilə imzalamaqdan imtina edib, qışda isə yeni klubu ilə danışıqlar apara bilər. PSJ futbolçunun davranışından narazı olduğunu bildirib və yeni müqavilə imzalanmadığı təqdirdə onu iyulun 31-dən satışa çıxarmağa hazırlaşır.