“Əl-Hilal”ın hücumçusu Neymar klubdan onu “Barselona”ya icarəyə verməsini istəyib.
Lent.az xarici mediaya istinadla bildirir ki, braziliyalı dizindən zədəsini sağaltdıqdan sonra bir ili icarə əsasında İspaniya klubunda keçirmək istəyir. Qeyd olunur ki, klublar hələlik futbolçunun transferi ilə bağlı heç bir danışıqlar aparmayıb.
Xatırladaq ki, “Əl-Hilal” ardıcıl 29 qələbə qazanaraq Səudiyyə Ərəbistanı çempionatında 68 xalla 1-ci pillədə qərarlaşıb ki, bu da Kriştiano Ronaldonun oynadığı 2-ci yerdəki “Əl-Nəsr”i 12 xal qabaqlayır.
Bu mövsüm Neymar beş matçda iştirak edib, bu matçlarda bir qol vurub və üç məhsuldar ötürmə edib. Braziliyalı futbolçu zədə səbəbindən mövsümün çox hissəsini buraxıb. Neymar əvvəllər Çempionlar Liqasının qalibi olduğu “Barselona”da oynayıb.