Mourinyo "Barselona"nın baş məşqçisi olmaq üçün müraciət etdi

“Roma”nın keçmiş baş məşqçisi Joze Mourinyonun agenti Xorxe Mendes müştərisinin xidmətlərini “Barselona”ya təklif edib.

Lent.az xarici mediaya istinadla bildirir ki, Mendes “Barselona” ilə Mourinyo arasında mümkün əməkdaşlığı müzakirə edərkən yarana biləcək maliyyə fikir ayrılıqlarını həll etməyə hazırdır.

O da qeyd edilir ki, mümkün problem Mourinyonun bir vaxtlar “Real Madrid”ə rəhbərlik etməsi və bir çox ispan azarkeşlərin bunu həmin klubla əlaqələndirməsi ola bilər.

Xatırladaq ki, daha əvvəl “Barselona”nın baş məşqçisi Xavi mövsümün sonunda vəzifəsini tərk edəcəyini açıqlayıb.

Mourinyo da öz növbəsində 2021-ci ildən tutduğu “Roma”nın baş məşqçi postunu yanvarın 16-da tərk edib.