Mbappe gəlsə, “Real”dan gedə bilər

Madrid "Real"ının hücumçusu Vinisius Junior PSJ-nin hücumçusu Kilian Mbappeni transfer etsə, klubdan ayrıla bilər.

Lent.az xarici mediaya istinadən bildirir ki, daha əvvəl "Real"ın Mbappe ilə transferdə tam razılığa gəldiyi açıqlanmışdı.

“Əgər Mbappe gəlsə, o zaman kimsə mütləq “Real”ı tərk etməli olacaq, çünki kluba pul qazanmaq lazımdır. Biz Vinisius haqqında ona görə danışırıq ki, o, çoxlu pul qazandıra biləcək oyunçudur”, – məlumatda vurğulanır.

Bu mövsüm 25 yaşlı Mbappe PSJ-nin heyətində 24 oyuna çıxıb, 25 qol vurub və 3 məhsuldar ötürmə verib. Onun Fransa komandası ilə müqaviləsi 2024-cü ilin yayında başa çatır. “Transfermarkt” portalı futbolçunun dəyərini 180 milyon avro qiymətləndirir.

23 yaşlı Vinisius Junior bu mövsüm "Real"ın heyətində bütün turnirlərdə 14 oyun keçirib, 6 qol vurub və 4 məhsuldar ötürmə edib. Braziliyalı oyunçunun “Kral klubu” ilə müqaviləsi 2027-ci ilin iyununun sonunda başa çatır. “Transfermarkt” portalı futbolçunun bazar dəyərini 150 milyon avro qiymətləndirir.