FHN-in qurumları arasında səmti müəyyənetmə üzrə çempionat keçirilib

Fövqəladə Hallar Nazirliyi İdman-sağlamlıq klubunun təşkilatçılığı ilə Qəbələ rayonunun meşə zolağında Nazirliyin qurumları arasında səmti müəyyənetmə üzrə çempionat keçirilib.

Bu barədə Lent.az-a FHN-in mətbuat xidmətindən məlumat verilib.

Bildirilib ki, çempionatda FHN-in Aparatı və qurumlarını təmsil edən 17 komandadan 70-ə yaxın əməkdaş qüvvələrini sınayıb.

Yarışın son günündə komanda və şəxsi (kişilər və qadınlar) hesab üzrə qaliblər müəyyən olunub.

Çempionatın bağlanış mərasimində, əvvəlcə Dövlət Himni səsləndirilib.

Qalib idmançıları təbrik edən FHN-in İdman-sağlamlıq klubunun rəisi polkovnik Füzuli Musayev müxtəlif idman növləri üzrə Nazirliyin komanda və əməkdaşlarının respublika və beynəlxalq turnirlərdə qazandığı nailiyyətlərdən bəhs edib, onlara gələcək yarışlarda uğurlar arzulayıb.

Yarışda komanda hesabında 1-ci yeri Dövlət Yanğından Mühafizə Xidməti (DYMX), 2-ci yeri Tikintidə Təhlükəsizliyə Nəzarət Dövlət Agentliyi (TTNDA), 3-cü yeri isə Xüsusi Riskli Xilasetmə Xidmətinin (XRXX) komandası tutub.

Bundan əlavə, qadınlar arasında şəxsi yarışlarda 1-ci yerə TTNDA-nın əməkdaşı Sevda Verdiyeva, 2-ci yerə Mülki müdafiə qoşunlarının (MMQ) əməkdaşı Fəridə Hüseynzadə, 3-cü yerə isə FHN-in Aparatının əməkdaşı Xatirə Şahverdi layiq görülüb.

Kişilərin yarışında 1-ci yeri FHN Akademiyasının əməkdaşı Özcan Kərimov, 2-ci yeri MMQ-in əməkdaşı Alxas Məmmədli, 3-cü yeri isə Aviasiya dəstəsinin əməkdaşı Taleh Nəbiyev tutub.

Qaliblərə kubok, diplom və medallar təqdim olunub.

Həmçinin, çempionatın keçirilməsində fəaliyyətinə görə FHN-in Mülki müdafiə qoşunlarının N saylı hərbi hissəsinin komandiri polkovnik Amil Alıcanov, Nazirliyin Tibb xidmətinin əməkdaşları və Azərbaycan Respublikası Səmti Müəyyənetmə İdman Federasiyasının hakimlər komitəsi fəxri fərmanlarla təltif olunublar.

FHN-in qurumları arasında səmti müəyyənetmə üzrə çempionat keçirilib