Qus Hiddink 10 futbolçunu Türkiyə yığmasından qovdu

Lent.az-ın “Fanatik” qəzetinə istinadən verdiyi məlumata görə, “ay-ulduzlular”ın noyabrın 17-də Amsterdamda Hollandiya ilə keçirəcəyi yoldaşlıq görüşünə hazırkı heyətdən 10-a yaxın futbolçu çağırılmayacaq.

Bununla da Hiddink son illərin ən ciddi islahatını aparmağa qərar verib. O, öz klublarında əsas heyətə düşə bilməyən oyunçuları milliyə çağırmayacaq. Əvəzində baş məşqçi həmyerliləri ilə qarşılaşmada daha gənc və klublarında daha çox oynama şansı olan istedadlı futbolçulara şans verəcək.

Hollandiyalı mütəxəssis bu mövsüm ehtiyat oyunçular skamyasında “pas atan” Tuncay Şanlı və Nihat Kahveçi başda olmaqla, Hakan Balta, Halil Altıntop, Özər Hurmacı, Sabri Sarıoğlu, Sercan Yıldırım və Semih Şəntürkü qarşıdakı oyuna dəvət etməyəcək. Hiddink bu oyunçuların öz klublarında əsas heyət üzvünə çevriləcəyi anadək qərarından dönməyəcək. 64 yaşlı mütəxəssisin arxa çevirdiyi oyunçular arzulanan formaya düşsələr, 29 mart 2011-ci ildə Türkiyə millisinin Avstriya ilə keçirəcəyi rəsmi matça dəvət ala bilərlər.

Qeyd edək ki, Türkiyə millisi Almaniyaya 0:3, Azərbaycana isə 0:1 hesabı ilə uduzub.