Türkiyə millisi “Bakı”nın bazasındakı meydançadan qorxdu - FOTO

Lent.az-ın “Habertürk”ə istinadən verdiyi məlumata görə, futbolçular Biləcəri qəsəbəsində yerləşən bazaya gələrkən, xoşagəlməz sürprizlə qarşılaşıblar.

Onlar ot örtüyünün çuxurlar üzündən dəlik-deşik vəziyyətə düşdüyünün, parça-parça kəsilən çimlərlə düzəltməyə çalışıldığının şahidi olublar. Qazonun rəzalətli durumda olduğunu yazan türkiyəli həmkarlarımız belə ot örtüyünün həm məşqçilər heyətini, həm də oyunçuları çaşqın vəziyyətə saldığını iddia edib. “Ay-ulduzlular” bu cür meydançanın Arda Turanda olduğu kimi, qasıq nahiyəsindən zədəyə yol aça biləcəyini söyləyə-söyləyə meydançanı yoxlayıblar.

Bu vaxt onlar üçün alternativ variant ortaya çıxıb. Təqribən 20 metr aralıda olan süni örtüklü meydança Türkiyə yığmasına təklif olunub. Lakin futbolçular süni meydançadansa, dəlik-deşik ot örtüyündə məşq etməyi üstün tutublar. Saatyarımlıq məşq zamanı onlar zədələnmə təhlükəsini də göz önünə gətiriblər.

Qeyd edək ki, Türkiyə millisinin növbəti məşqi oktyabrın 11-də saat 19:00-da Tofiq Bəhramov adına Respublika stadionunda olacaq. Ertəsi gün saat 20:00-da isə “ay-ulduzlular” Azərbaycan yığması ilə oyuna çıxacaqlar.