Azərbaycan şahmatçıları olimpiadanı medalsız başa vurdu

Lent.az-ın məlumatına görə, yarışda iştirak edən Azərbaycanın kişi və qadınlardan ibarət milli komandaları mükafatçılar sırasına düşə bilməyiblər.

Qadınların mübarizəsində komandamız sonuncu turda Vyetnama 2,5:1,5 hesabı ilə qalib gəlib. Şahmatçılarımızdan Zeynəb Məmmədyarova və Gülnar Məmmədova qələbə qazanıb, Nərgiz Umudova heç-heçə edib, Türkan Məmmədyarova isə uduzub. Bununla da yığmamız olimpiadanı 16 xalla 7-ci pillədə başa vurub. Gürcüstan, Kuba, ABŞ, Polşa və Bolqarıstan da eyni xal yığıb, lakin əlavə göstəricilərə əsasən, komandamız yalnız Bolqarıstanı geridə qoya bilib. Qalib adını 11 turdan maksimum nəticə (22 xal) göstərən Rusiya qazanıb. Çin 18 xalla 2-ci, Gürcüstan 16 xalla 3-cü olub.

Kişilərin yarışında isə yığmamız öncədən favoritlər sırasında göstərilməsinə baxmayaraq, ilk “10-luğ”a belə daxil ola bilməyib. Sonuncu turda millimiz Rusiyanın 3-cü komandası ilə heç-heçə edib – 2:2. Şahmatçılarımızdan Teymur Rəcəbov qalib gəlsə də, Şəhriyar Məmmədyarov və Rauf Məmmədov heç-heçə edib, Eltac Səfərli isə uduzub. Bununla da 11 görüşdə cəmi 15 xal toplayan yığmamız 12-ci yeri tutub. Olimpiya çempionluğunu 19 xal yığan Ukrayna bayram edib. Rusiyanın 1-ci komandası 18 xalla 2-ci, İsrail isə 17 xalla 3-cü olub.