“Neftçi” “Xəzər Lənkəran”ı bir həftəyə “taxt”dan saldı

Lent.az-ın məlumatına görə, oktyabrın 2-də Lənkəran şəhər stadionunda “Bakı” ilə heç-heçə edən baş məşqçi Mirça Rednikin komandası “Neftçi”nin bir həftədən sonra “taxt”a qayıtmasına mane ola bilməyib.

Baxmayaraq ki, hesabı məhz “Xəzər Lənkəran” açıb. 23-cü dəqiqədə kosta-rikalı hücumçu Uinston Park fərqlənib. İlk yarı meydan sahiblərinin qələbəsi ilə nəticələnib. Fasilədən sonra da üstünlük lənkəranlıların tərəfində olub. 74-cü dəqiqədə Jabanın meydançadan qovulması ilə “Bakı” azlıqda qalıb. Lakin paytaxt klubu sona 5 dəqiqə qalmış məğlubiyyətdən xilas olmağı bacarıb. Vaqif Cavadovun künc zərbəsindən sonra fransalı legioner Stefan Barbikoni topu Kamran Ağayevin qoruduğu qapıdan keçirib. Amma nədənsə, matçın protokolunda qol Cavadovun ayağına yazılıb. Bu, həm də “Xəzər Lənkəran”ın cari mövsümdə qapısında gördüyü ilk qol olub.

Bu heç-heçədən sonra “Bakı” 9 xalla 9-cu pillədə qalıb. “Qarabağ” Tovuzda “Turan”ı, “Gəncə” isə Bakıda MOİK-i yenib və turnir cədvəlində müvafiq olaraq, 5-6-cı yerlərə yüksəliblər.

2 oktyabr (şənbə)

“Turan” (Tovuz) – “Qarabağ” (Ağdam) – 0:1
Emin İmaməliyev, 55

MOİK (Bakı) – “Gəncə” – 0:5
Junivan Suares, 11; 42. Samir Zərgərov, 73. Ceyhun Sultanov, 82-penalti ilə. Armand Feutçine, 90+1
Qırmızı vərəqə: Rafael Əmirbəyov, 83 (“Gəncə”)

“Xəzər Lənkəran” – “Bakı” – 1:1
Uinston Parks, 23 – Vaqif Cavadov, 85
Qırmızı vərəqə: Jaba, 85 (“Bakı”)

1 oktyabr (cümə)

“Simurq” (Zaqatala) – “Qəbələ” – 0:2
Saşa Yunisoğlu, 14. Terri Kuk, 85

“Neftçi” (Bakı) – AZAL (Bakı) – 1:0
Emil Mpenza, 3

“İnter” (Bakı) – “Muğan” (Salyan) - 1:0
Girt Karlson, 81-penalti ilə

1. “Neftçi” – 19 xal
2. “Xəzər Lənkəran” – 18
3. “İnter” – 16
4. AZAL – 14
5. “Qarabağ” – 11 (7 oyuna)
6. “Gəncə” – 11
7. “Qəbələ” – 10
8. “Muğan” – 9
9. “Bakı” – 9 (7)
10. MOİK – 4
11. “Turan” – 3
12. “Simurq” – 3.

Bombardir: Bahodir Nasimov (“Neftçi”) – 9, Qvidas Yuşka (AZAL) – 5 qol.